الأربعاء، 30 سبتمبر 2009

الاولى .فى الغرام


اهلا بيكم اهلا بيكم يا اللى احنا جينا عنديكم
والسلام عليكم
اصل احلى الكلام يبدأ تمللى بكلمة سلام
واحلى كلمة سلام:السلام عليكم ورحمة الله وبركاته
وتانى كلمة حلوة نقولها :
اللهم صلى وسلم وبارك على خير الخلق اجمعين وعلى أله وصحبه
وسلم تسليما كثيرا الى يوم الدين
احم ...احم وسع يابنى انت وهو المعلم جاى
بس احب ابشركم بشرى سارة( مش شيرين ولا منى ولا حاجة)
البوست طويل والرغى بتاعى كتيييير بس قبل ما ابدأ وزى ما انا وعدته لازم كل اللى
بيحب المدونة دى او حتى بيجى يزورها من غير ما يحبها يدخل يزور مدونة
شاب فقرى صدقونى هتلاقوا المدونة لذيذة وكلامه الذ الذ
اصل انا وعدته اعمله دعاية مجانية اوعى حد يكسفنى بقى
ده اول مرة اطلب منكم طلب
اللينك اهو
http://shab-f2ry.blogspot.com/

ياه صبرتوا ونلتوا
ندخل ف الموضوع بقى
انا هاتكلم النهاردة عن صاحبى اه صاحبى وحبيبى وكفاءة
هاتكلم عن حبيب قلبى بجد
اصل انا حبيتشه وحطيته جوه قلبى وانا قلبى مش متين
من حبه جالى سكر وبتحايل عليه يدينى انسولين
بجد حاسة انه راجلى وانى بضيع اما بيبعد عنى عارفين اما بابا
وماما سافروا كنت حاسة بالامان المؤقت بس عشان هو معايا
احلى حاجة ف الدنيا اما تلاقى حد قريب من سنك يفهمك وتفهمه يحس بيك
بجد حبه مش زى اى حب حب من نوع (خاص جدا)من نوع فريد
هو مصطفى من بين الناس وهو ده اللى اصطفاه قلبى من بين كل الشباب
عشان املكه ليه
مش عارفة اما يجى عدلًى يعنى واتجوز (بعد عمر طويل)
هل منكن يعنى منكن؟ان احب زوجى الحب ده كله لااعتقد!Idk
مش بقولكم حب لن يتكرر من نوع خااااااااااص
بيغير عليا موووووووووووووت بيغير عليا من اعز اعز اصحابه اللى هما اخواته وجيران لينا
يعنى يعتبر من قرايبنا بس بحب غيرته عليا بفرح اوى اما بيبرق لى يعنيه العسلية ساعة ماا اطلع البلكونة
وشعراية باينة من تحت الخمار دون قصد طبعا
اقولكم بقى اثر فيا ازاى:اولا:-علمنى ان انا بساذجتى دى مش هانفع ف الدنيا
علمنى الجرأة وازاى افرق بينها وبين البجاحة علمنى ازاى اخد حقى بادب واحترام
ثانيا:وفر عليا انى ادور على صديق يحفظ سرى واثق فيه تصدقوا بايه
ساعة ما بنقعد مع بعض ف البلكون باليل مش بحس انى بتكلم مع واحدة صاحبتى
اقصد فى اللكلام يعنى الحاجز اللى بين اى بنت وولد بنكلم بحرية وبقعد احكى ع الكلام اللى
حصل بين وبين اصحابى ومدرسينى وحتى لو بابا وماما زعلوا منى
هو اللى تلاقيه بيتوسط ليا عندهم
والله وانا فى الثانوية هو اللى كان بيشجعنى على المذاكرة يقعد يقولى
صاحبى فلان مستنيك فى كلية صيدلة وهيظبطك فى المحاضرات
والجداول وكده يعنى وكان تشجيعه بيجى بفايدة جامدة
بس يلا اهو نصيب

علمنى كمان ازاى اسامح اى حد غلط ف حقى وكان بيقولى افرضى توفيت

وانتى مش مسمحاه هيجى يوم القيامة وياخد منك حسنات طب وليه

اما ف ايدك تسامحيه وتغفرى ليه اى حاجة وحشة عملها معاكى وتبقى انتى اللى كسبانة

بجد يا جماعة باحمد ربنا واشكره ف كل صلاة على نعمة الاخ دى وبدعيله انه ربنا يخليه ليا

ومايحرمنيش ابدا منه

انا دلوقتى عايشة اجمل قصة حب ما بين احلى اتنين اخوات

عارفين مسلسل الكارتون بتاع سالى ولا بتاع سارة وليدى

اهو انا زيهم كده هو كمان بيحيهم وبيموت ف كابتن ماجد

مش عارفة اقوله ايه اشكره على اللى عمله معايا زمان ولا اللى لسه هيعمله معايا

بعدين طب اقولكم على سر

قالى ان هو مش هيفكر ف اى واحدة خالص لحد ما انا اتجوز وبعدين هو يبقى يفكر

الى اللقاء ف الحلقة القادمة من المسلسل الشرقاوى بتاعى

سلام عليكم

الثلاثاء، 29 سبتمبر 2009

كمان تصبيرة ....بس حلوة


اكيد يا جماعة انا الاخير
واكيد اكيد سبقونى كتيير بس
ادعو ربنا انه يكون جزائنا كلنا كبييير
وعشان انا وعدت طهر فؤادك انى هانشر البوست بتاعه فانا هانشره
واكيد مش كفاية النشر لازم تكون المشاركة فعليا وعمليا
وهو ربنا يكرمه ويجازيه عنا كل خير سهل علينا كل السبل والطرق
وياريت ما يزعلش منى عشان اتأخرت شوية
اترككم مع البوست الهايل بتاعه
فكرة حملة انقذ طفلك:
- اولا اسم الحملة نابع من ان الاطفال الى ان شاء الله هنساعدهم (اطفال مستفى 57357 )زى اطفالنا فواجب علينا نعمل كدة او هنقدم حاجة بسيطة لمساعدتهم وان شاء الله تكون ليها اثر كبير بأذن الله وخير علينا كلنا بأذن الله ومش تفتكروا ان مسعدتكوا دى بسطة لا بالعكس ومش كلامى دة كلام رسولنا العظيم ومعلم البشرية جمعاء :-قال أتى النبي صلى الله عليه وسلم رجل يستحمله فلم يجد عنده ما يتحمله فدله على آخر فحمله فأتى النبي صلى الله عليه وسلم فأخبره فقال إن الدال على الخير كفاعله وفي الباب عن أبي مسعود البدري وبريدة قال أبو عيسى هذا حديث غريب من هذا الوجه من حديث أنس عن النبي صلى الله عليه وسلم ...قوله : ( يستحمله ) أي يطلب منه المركب ( فحمله ) أي أعطاه المركب ( فقال ) أي رسول الله -صلى الله عليه وسلم- ( إن الدال على الخير كفاعله ) لإعانته عليه ، فإن حصل ذلك الخير فله مثل ثوابه ، وإلا فله ثواب دلالته قاله المناوي .
هنساعدهم ازاى؟؟؟؟؟
- ان شاء الله الفكرة ببساطة اننا عاوزين كل المدونات الى هتشترك معانا فى الحملة دى هتحط شعار المستشفى واللينك الخاص بالمستشفى على المدونة الخاصة بكل واحد هيشترك بأذن الله معانا وكمان فوق الشعار هتكون كلمة( اتبرع وانت فى بيتك ولو بجنية او دولار من هنا ) والناس الى مبتدئين فى المدونات هشرح لهم بطريقة مختصرة ازاى هيحطوا الصورة واللينك وهى( انكوا تفتحوا صفحة التخطيط فى مدونتكم وبعدين اضافة اداة وبعدين نختار من اضافة اداة اختيار اضافة صورة وبعد كدة لما تفتح نحط فى خانة اسم النموذج الكلام الى اتفقنا علية وهو" اتبرع وانت فى بيتك" وفى خانة وصل هنحط اللينك بتاع موقع مستشفى 57357 والى هو http://www.57357.com/Default.aspx?PageContentID=8&tabid=155
وبعد كدة هنضيف الصورة بتاعة المستشفى وهى موجودة اعلى الموضوع بتاعى فوق وبس وجزاكم الله خيرا ) علشان فية ناس كتيرة متعرفش عن طرق التيرع الى هى كتيرة ومش معروفة وممكن تحقق عائد كبير جداا جداا ومش متركز عليها فى اعلانات التلفزيون والراديو ووسائل الاعلام وهدفنا فى الحملة دى اننا نوضح طرق التبرع المتعددة الى بدورها هتجيب عائد اكبر واكتر لو كل واحد استخدم ولو طريقة واحدة وهو فى بيتة وهقولوكوا نبذة عن طرق التبرع دلوقت :- ....
1 - البنوك :- (ودى متركز عليها كتير فى وسائل الاعلام ومش هنخوض فيها ) .
2 - انترنت الخير (هنركز اكتر عليها ):-يمكنك التبرع من خلال أستخدام ارقام انترنت الخير : 07775757 أو 07075757 بنفس سعر المكالمة العادية كما انه يمكنك حساب صافي قيمة ما تبرعت به بأستخدام عداد الخير ...
3 - التليفون (هنركز اكتر عليها ):- يمكنك الاتصال برقم 1468 أو 2357 من اي تليفون محمول او برقم 09009555 أو 09000957 و التبرع لصالح المستشفى اثناء استماعك للرسالة الصوتية . سعر الدقيقة جنيهان
4- بطاقة الائتمان (هنركز اكتر عليها ):- خدمة جديدة تقوم بها مستشفى 57357 لتسهيل التبرع بالتعاون مع بنك مصر و شركه Verisign العالمية لتأمين المواقع على الانترنت. يمكنك التبرع بأي عملة صدرت بها بطاقتك الائتمانية في أي بلد في العالم بما يعادلها من الدولار و ستقوم مؤسسه فيزا و ماستر كارد بتحويلها إلى دولار .فقط اضغط على اختيار دولار ,فنحن بحاجة إلى العمله الصعبة لتمويل عملية استيراد الأجهزة و المعدات الطبية .
5 - البريد المصرى (هنركز اكتر عليها ):- يمكن التبرع فى اى فرع من فروع مكاتب البريد المصرى لحساب رقم 26386
**** حملتنا على ال facebook ( ودى اهداء من مدونة قطرات ندى . جزاها الله خيرا ) :-
- احب قبل وماكتب لينك الجروب علشان ان شاء الله تشتركوا معانا فية احب اشكر المدونة وربنا يجزيها خير ودة مثال حى للعمل الجماعى و ياريت كمان ياجماعة الى يحب يشارك بعمل شعار للحملة وعندة معرفة بالفوتوشوب ويصمم شعار خاص للحملة يبقى جزاة الله خيرا وربنا يجعل عملة فى ميزان حسناتة ان شاء الله .واليكم لينك الجروب على الفيس بوك :-
ياجماعة وعشان ننول الخير والجزاء من رب العباد عايزين نيتنا تكون خالصة
لوجه الله تعالى ويكون البوست ده صدقة جارية
زى ما قال حبيبنا ورسولنا الكريم فى حديثه:
اذا مات ابن آدم انقطع عمله الا من ثلاث:
صدقة جارية او علم ينتفع به او ولد صالح يدعو له
رواه مسلم
كده البوست خلص وياريت تكون مهمتى فى توصيل الخبر والنشر
كملت ارجو ذلك
حقوق الطبع والنشر والتوزيع فى جميع انحاء البلوجر محفوظة
فى مدونة طهر فؤادك
وشكرا.....

السبت، 26 سبتمبر 2009

تمهيد


سلام عليكم
وعليكم السلام
واحلى الكلام يبدأ تمللى بكلمة سلام
لو ع السلام مليون سلام
لو ع الحمام اسراب حمام
بس السلام يبقى باصول
مش ضحك يابا ع الدقون
ولا فض مجالس والسلام

ده كله عشان اقولكم السلام عليكم ورحمة الله وبركاته ده بقى اولا

اما ثانيا :عاملين ايه بقى من غيرى ؟؟؟؟؟؟؟؟ هه

اكيد اكيد طبعا كويسين

ثالثا :بقى وده الاهم ان بعد عناء طويل جدا وعريض جداجدا

وبعد استشارة حبيبة قلبى دموع القمر ربنا يقومها بالسلامة ويشفيها

ويخليها لينا ومايحرمناش منها

وامورتى الحلوة بنوتى القطقوطة بنوتة ربنا يفك كربها ويهديها

قالولى انى ابدأها باكثر شخصية اثرت فيا اوى واكيد طبعا بالايجاب

يعنى اخليها فرايحى ف الاول فقررتى ان اتكلم عن

ماماتى حبيبتى

لالالالا طبعا قولولى ليه؟؟؟؟؟؟

قولتولى ليه اقولكم عشان مش هيكفينى اكتب عنها ولا اقول عنها اى حاجة مش هيكفينى المدونة بحالها

لانها عملت معايا حاجات من قبل ما اتولد اشاسا فمش هاعرف اوجز او اختصر بتاتا

فى كلامى عنها

طويب يعنى على كده هتكلمى عن

بابتك روح قلبك

لالالالا برده قولولى ليه ؟؟؟؟؟

قولتولى ليه

لان باباتى ده مش هاعرف الاقاى كلمة تجمع كل

مشاعرى ناحيته وخايفة اتكلم عن حبه فى قلبى

اجور على حق اى حد تانى بحبه

مش هاعرف اوفيه حقه اطلاقا

عارفين كنت هاكتب ف الاخر ف المكان ده يعنى شعر عنهم

ومنطبق عليهم بس مالقتش الكلام اللى يليق بيهم

يمكن اقوله ف البوست اللى جاى

بس اقدر اقول ليهم اللى انا حاساه دلوقتى

ان كلمة بحبكم كلمة قليلة اوى اوى عليكم

لوحاولت اتكلم عن فضلكم هاقصر كتيير

فى حقكم

معرفتش قيمتكم الا بعد ماغبتوا عنى يارب ترجعوا ليا بالسلامة

الواحد ضايع من بعدكم ضايع بمعنى الكلمة

لكم منى جزيل الشكر والثناء الحسن

طاااايب بس يا دكتورة النكد انتى لسه لحد دلوقتى ماقولتيش هتكلمى عن مين

تفتكروا هى ميس نكد هتكلم عن مين

ده اللى هنعرفه ف الحلقة اللى جايه قصدى فالبوست اللى جاى

................ابقوا معنا...............

ملحوظة:اوعى حد ينسى يأمن على الدعاء اللى فوق ده شمال ف يمين هتلاقيه ف

الوش على طول قولوا آآآآآمين


الأحد، 20 سبتمبر 2009

عيد سعيد اكيد

بسرعة كده عشان انا على طول باجاى فى الوقت بدل الضايع
وساعات بعد ما الحكم يطلق صفارته ويعلن بانتهاء اللقاء
وتكون النتيجة تعادل بالسلب
بس انا ماهانش عليا يجى العيد ومااقولش كل سنة وانتم طيبين لحبايبى الحلوين
وقولت لازم اصبرهم شوية على بال ما البوست الجديد ينزل
بس انا زحلانة يا جماعة
شوفتوا اول عيد مش هاقضيه مع باباتى وماماتى
عشان هما مسافرين فى العمرة ادعولهم يرجعولى بالسلامة
يحسن انا ضايعة من غيرهم خاااااااااالص
وعشان انا بحبكم اوووووى جبتلكم حاجة حلوة تصبركم شوية
حاجة كده على قد المقام شوية كحك وبسكويت وبيتى فور وبيتى فايف
وكده يعنى
وعشان ما تعبكوش معايا انا جبت معايا الشاى والقهوة والذى منه
يعنى مش حرماكم من حاجة
ماعملتش زى دموع القمر (هههههههه)
لالالا دى عثل والله واهل للكرم
ربنا يخليها لينا يارب ومايحرمناش من بوستاتها الجميلة
اسيبكم بقى مع الكحك وشوفوا عمايل ايديا وحياة رجليا
قصدى عنيا
يووووووووه كنت هانسى
كل عام وانتم بخيييييييييييييييييير



الاثنين، 14 سبتمبر 2009

شخصيات فى حياتى


اولا السلام عليكم ثانيا رمضان كريم وكل سنة وانتم طيبين بمناسبتين
الاولى طبعا ليلة القدر يارب يبلغنا اياها على خير وتكون ليلة عتق رقابنا
جميعا من النار وتكون ليلة العفو والصفح عنا من رب الخلق اجمعين
اللهم آآآآآآآآآآآآآآآآآمين
والتانية ان العيد خلاص كلها ايام ويجى والعيد فرحة يا طيبيبن
المهم ندخل فى الموضوع بس برجلينا اليمين عشان الشيطان
انا قعدت افكر اكتب ايه بعد رمضان ما يخلص حاجة تفيدنى وتفيدكم كمان
قولت خليها تبقى تجربة واجرب اكتب عن شخصيات اثرت فى حياتى
اما بالايجاب او بالسلب هاقول تصرفات الشخصية دى معايا ومع غيرى
ومش هاقول رايى انا فيها واسيبكم انتم تحكموا وتقرروا اذا كانت شخصية
فعلا تستاهل ان الواحد يكتب عنها ويستفيد منها ولا ايه؟؟؟؟؟؟؟
لان ممكن جدا فى ناس كتيييير جدا فى حياتى مبقاش عارفة قيمتهم
الا بعض ما استعرض شريط حياتهم معايا
فقولت لازم اشارك حبايبى الحلوين معايا هو انا ليا مين غيركم
اه وممكن استاذن حضراتكم فى حاجة اخيرة انا ممكن اما ابقى اكلم عن شخصية معينة
مش لازم اقول ايه هى علاقاتى المباشرة معاها هاقول سين من الناس وخلاص
ممكن اكون بقلد برنامج ايه ؟؟؟؟ امممممممممم خلينا نشوف؟؟؟؟؟؟؟؟
ايوة صح تصدق برافو عليك بين الناس
صح ولا انا غلطانة
كان برنامج حلو والله ياليت الشباب يعود يوما
دمتم بخير وبصحة وبسلامة وعافية وامان ورعاية الله

الاثنين، 7 سبتمبر 2009

انما الحلم بالتحلم والصبر بالتصبر



اولا البوست ده منقول عن عمود فى جريدة الاهرام

بيتكلم عن صفة محتاجينها اوى فى مجتمعنا ومفتقدينها جدا فى وسط هذى الدنيا

الاخاذة التى تلهى الانسان وتاخذه الى حيث لا يرجع


قال ابن عباس -رضى الله عنه-ثلاث من لم تكن فيه واحدة منهم فلا تعتدوا بشئ من عمله:

تقوى تحجزه عن معاصى الله-عزوجل-وحلم يكف به السفيه وخلقٌ يعيش به فى الناس


وعن عبادة بن الصامت:قال رسول الله -صلى الله عليه وسلم -(ماتصلى عليه بدل ما انت ساكت كده)

الا ادلكم على ما يرفع الله به الدرجات قالوا: بلى يارسول الله قال تحلم على من جهل عليك وتعفو عمن ظلمك

وتعطى من حرمك وتصل من قطعك

صلى الله عليك يا حبيبى ما اروعك كلها اخلاق محتاجينها جدا فى الوقت الحالى وبما اننا فى شهر كريم

فهى فرصة لنطبق سنته وخصوصا ان شوشو -الله يحرقه-مصفد دلوقتى فى جهنم الله يبعده عنا


وقال -عزوجل-فى كتابه المجيد :كونوا ربانين اى حلماء علماء كما قال مجاهد واذا مروا باللغو مروا كراما واذا

اوذوا صفحوا كما يقول تعالى ايضا :"واذا خاطبهم الجاهلون قالوا سلاما" قال الحسن:اى حلماء ان جهل عليهم احد لم يجهلوا


وقال على -كرم الله وجهه- ليس الخير ان يكثر مالك وولدك ولكن الخير ان يكثر عملك ويعظم حلمك

والا تباهى الناس بعبادة الله واذا احسنت حمدت واذا اسأت استغفرت

وقال عمر -رضى الله عنه- تعلموا العلم وتعلموا للعلم السكينة والحلم

وقال الحسن:اطلبوا العلم وزينوه بالوقار والحلم

وقال انس فى قوله تعالى "فإذا الذى بينك وبينه عدواة كأنه ولى حميم" يقصد به الذى يشتمه اخوه

فيقول ان كنت كاذبا غفر الله لك وان كنت صادقا غفر الله لى

يا الله مااحلاه وما اعظمه دينا وما ارقه تعامل قد صدق من قال الدين المعاملة وهذا هو ديننا فبالله عليكم

كيف يكون تعاملنا اللهم اصلح لنا الحال يارب اللهم آآمين


وقال السلف علامة:حسن الخلق عشر خصال:قلة الخلاف وحسن الانصاف وترك طلب العثرات وتحسين مايبدو من السيئات والتماس المعذرة واحتمال الاذى والرجوع بالملامة على النفس والتفرد بمعرفة عيوب نفسه دون غيره وطلاقة الوجه للصغير والكبير ولطف الكلام عمن دونه وعمن فوقه



رزقنا واياكم حسن الخلق ومتعتنا بالقرآن وان يجعله ربيع قلوبنا ونور صدورنا وجلاء احزاننا وغياب همومنا وغمومنا

وان يذكرنا منه مانٌسينا ويعلمنا منه ما جهلنا ويرزقنا تلاوته اناء الليل واطراف النهار على الوجه الذى يرضيه عنا

برحمته فهو ارحم الرحمين

السبت، 5 سبتمبر 2009

قولت ادعولى مش ادعو عليا


ااااااه يا حبيبى يا منخورى
حرام عليكم بقى كده هى دى وصيتى اللى قولت ليكم
ادعولى
ده كله عشان قولت هاسيب التدوين شوية
هو انا بصراحة اللى غلط ساعة ما قولت نهائيا
هى مؤقتا
بس انا رجعت وكتبت فى التعليقات
هان عليكم العيش والبطيخ اللى اكلنا سوا
ها ها ها لا خلاص راحت
اصلى كنت عايزة اعطس
ماشى ده انتو زعلكم وحش اوى
خلاص توبة
سماح بقى بس زى ما اتفقنا مؤقتا
لانى انا اللى مقدرش استغنى عنكم ابدا
عذرا عشان يعنى مالونتش فى الخط ولسوء البوست
لانى عنيى مش شايفة حاجة اصلا مغبشة
ومش مركزة فى حاجة خاااااااالص
موبايلات بقى هه
سلامات سلامات

الجمعة، 4 سبتمبر 2009

قررت ان اتنحى نهائيا

اولا السلام عليكم ورحمة الله تعالى وبركاته
ثانيا انا قولت لحضراتكم كل سنة وانتم طيبين
نقول تانى رمضان كرييييييييم وعساكم من
عواده وبلغنا واياكم ليلة القدر على خير يارب
بسرعة كده وبدون مقدمات انا هاقولكم على حاجة وعايزاكم
تشجعونى عليها
قررت ان اتنحى نهائيا عن التدوين وان اعود الى صفوف
الجماهير المصرية العريضة امارس دورى فى مطبخى
كأى مواطن عادى
هو فى سببين لانتهاء خدمتى فى عالم التدوين
والسبب الرئيسى ممكن توضحه لينا الصورة اللى قدامكم
دى تمعنوا فيها بشدة
شايفين قد ايه الحب والحنان
شايفين قد ايه الالفة
انا قولت اتفرغ للحلوين هناء وشيرين ولازم التفرغ
ده يكون من النهاردة يعنى عشان لا يشغلنى عنهم
شاغل ودول اللى هينفعونى فى المستقبل مش كده
ولا ايه؟؟؟؟؟؟
اما الصورة دى بقى فلاقيتها معبرة عن اللى جوايا تجهاكم
فى الفترة القصيرة اللى قضيتها معاكم حسيت ان الدنيا
لسه بخير ولسه فيك بشر يا مصريحبوا من غير مقابل
ويتحبوا طبعا نتقابل بقى بعد الصورة
اوعوا تروحوا فى اى مكان.........


اهلا وحشتونى قولوا بقى امين للدعاء اللى فوق ده
انا قابلت ناس عبر التدوين ملاقيتش
زيها فى حياتى العادية ناس ذوق ومحترمة
ومثقفة وفوق كل ده طبعا دينها وربها
هو اول شئ عندها
مش هلاقى كلام غير
جزاكم الله خيرا
وعشان احنا فى عالم مفتوح واحنا مثقفين
شكرا بالانجليزى يعنى




بجد اتعرفت على اصدقاء جدد اصدقاء بكل ما تحتويه الكلمة من معان
يعجز الكيبورد عن شكرهم لذلك تركت ليهم هذة الرسالة



قبل الوداع يا احباب جه النسيم على بابى ودق الباب
قالى لازم يبقى ختامه مسك
اسيبك مع هذى الانشودة الرائعة
لعل كل واحد منا يتمنى ان تتحقق كل كلمة من كلماتها
استودكم الله الذى لا تضيع ودائعه
اوعوا تنسونى وابقوا ادعولى ان ربنا يوفقنى ويهدينى الى
مايراه هو خير
اللهم آآآآآآآآآآآآآمين