الاثنين، 24 فبراير 2014

احنا

إلى من ساقه قَدره إليّ :D
الحاج أبو العيال وكده
هذا ونظراَ لأنى لسه ماتوصلّتش لسبب ما يربطنى بيك
وخصوصا فى اوم الدنيا اللى قاعدين فيها دى ..
فانا فكرت فى شوية أشياء كده لعلّها تُسبب
فى الغالب والشئ اللى استحوذ على تفكيرى فى بداية الإجابة
هو انى عايزة حد احسن منى
الجملة المهروسة فى سبعتلاف مسلسل مصرى :
الوحيد اللى هابقى سعيد انه يكون أحسن منى هو ابنى !
-
مش فاهمة يعنى إيه وجه التعاسة لما تلاقى حد تعرفه يبقى أحسن منك ؟
ماعلينا
-
بس صِدقاً اللى فكرت فيه هو انى كنت محتاجة لشوية حاجات كده
ماعِرفتش اكفّى حاجتى ليا فقررت -بأنانية-انى اكفيّها لولادى
انا عندى قناعة تامة ان الأب والأم هما السبب فى نجاح او فشل الأبناء
-ولكل قاعدة شواذ- ، بس انا عارفة ومتيقنة ان صلاح الأبناء من صلاح الأبوين
مقتنعة تماماً ان الأب والأم لازم يتقنوا دورهم فى أول حياة عيالهم
لحد ما يوصلوا لسِن التفكير .. الوقت اللى يعرفوا يفكّروا فيه ويطلعوا بآراء مخالفة لارائهم ساعتها لازم يكفّوا أيديهم وألسنتهم عنهم
ويبقوا بس متفرجين اوبالأحرى  مستشارين .
دورهم فى بداية عمر عيالهم هو الأهم ..عشان هو ده حجر الأساس زى ما بيقولوا
فى طوبة وقعت بقى ولا الاسمنت مش تمام يبقى عليه العوض فى العمارة كلها
وعشان كده باحمّل الأبوين مسئولية فشل عيالهم ان ثبت إنهم قصّروا .

فكرة الإعداد دى صعبة وعايزة حد يتقنها .. ازاى اخلق له شخصيته
من غير ما اسيب بصمتى عليها
أيوة لازم ما تسيبش بصمتك عليها ، لازم نبطل بقى ثقافة
"انا ابوك وأدرى بمصلحتك" !
ماهو حضرتك لو كنت شاطر فى الإعداد ماكنش زمانك شايل همّ مصلحته لحد ما بقى شحط !

مش عارفة ليه كلامى قلب على محاضرة رياض أطفال كده !!
بس قشطة انا كل اللى عايزاه  عيالى يبقوا راضيين عنى .
انا معرفتش اكون حاجات كتير قوى .. وعايزاهم على قد مايقدروا
يكونوها أو على الأقل يجربوها .
مش عارفة دى أنانية ! ولا عجز ! ولا قصر ديل ؟

المهم انت دورك إيه بقى يا برنس فى الليلة الحلوة دى ؟
حضرتك اللى هتحط الاسمنت سعادتك
انا معنديش استعداد اشيل القوالب واعمل السقالة وانت قاعد
تشرب شاى وتقرأ جرنال !
هقول لهم إيه مثلاً ؟ ده سمسار جاى يعاين المكان ؟

ماينفعش تبقى عبارة عن خزنة بنكنوت متنقلة وشكراً على كده
فرقت إيه بقى عن الباقى ؟
يبقى هاتنيّل واتجوزك على إيه ان شاء الله ؟
يبقى نخلفهم ليه ولامؤاخذة ؟

معنديش أدنى استعداد اتحمّل ذنب نبتة تموت !
وعيالك نبتة هتتحاسب عليها

مش مُميّزة عشان اتقنعر عليك! .. قشطة والله موافقاك جداً
بس انا مش عايزة حد يتنقعر على ولادى .
لا انا ولا انت كاملين فى شخوصنا صح ؟!
نحاول نبقى متكاملين بقى ولا فالحين فى الكلام وبس ؟

المهم دلوقتى ان التفكير فى الإعداد مايوصلنيش للخوف منها .

هناك تعليقان (2):

الازهرى يقول...

:)



مش تريقة وربنا بس مش لاقى تعليق تانى

بيطرية ومش بايدى يقول...

وماله :)

صباح الفل