الثلاثاء، 17 يوليو، 2012

اصلها غلبانة .


يارب طبطب على قلبها ♥

ساعة فجرية

دى غلبانة و على قدها
يــارب :):

-----------
بحب اوى الدعاء بظهر الغيب 

ادعى لهم وهما مش موجودين

يعنى ادعى للناس اللى بحبهم

والملايكة اللى تقول آمين 

وتقولى ولكِ مثلهُ

--

وساعات كتير من كُتر حبى للناس دى 

ببقى نفسى اقول للملايكة 

قولى آمين اوووى ومش مهم ولك مثله

قولى آمين بقوة 

عشان ربنا يستجيب على طول 

--

يارب استجب يارب

ارجوك يارب

اصلها غلبانة وعلى قدها

وعايزة فعلا اللى يطبطب على قلبها

يارب ابعت لها اللى يفك حزنها 


ويرسم البسمة على وشها 


يارب
:)

الجمعة، 13 يوليو، 2012

صديقى عم محمد :)


حكاية عم محمد :)


حكاية من نسج الواقع

==


عم محمد شخص غلبان بيشتغل باليومية


او بالمسمى الفلاحى بتاعنا "ارزاقى "


يعنى اليوم بيومه بيشتغل اى حاجة وبياخد اللى فيه النصيب

يوم يمسح سلم.. يوم ينظف عربية.. يوم يشتغل مع العمال فى 



بناء بيت وهكذا

وكتير بيساعد فى اى تنظيف يتم للمسجد اللى فى شارعنا

عم محمد سِنه كبير وبيعول من الابناء اربعة

كل يوم بيجى يشتغل فيه لازم يخبط على صاحب المسجد

وينزل له السبًت ويحط له فيه 2 جنيه

ويقوله حطهم فى صندوق الجامع

ايه دول يا عم محمد ؟! يقوله ده رزق الجامع يا عم الحاج

حق ربنا عليا

==
يمكن يكون قليلين ال2 جنيه بس عند ربنا حاجة كبيرة اوى

عم محمد خصص جزء من "مرتبه " وقال ده لله

عمل بالآية " خذ من اموالهم صدقة تطهرهم وتزكيهم "

عمل بيها ومؤمن بالآية "وما تنفقوا من خيرٍ يُوفً إليكم وانتم لا 



تُظلمون "

:)

تعرف تعمل زى عم محمد؟! :)

الأربعاء، 11 يوليو، 2012

ياسمين الشــام :(:


 
مُتْ صامداً ...
حتى ولو هدموا بيوت الله
واغتصبوا المآذن،،

حتى ولو حرقوا الاجنة
فى البطون،،
وعربدوا وسط المدائن

حتى ولو صلبوك حيا،،
لاتهادن

لن يستوى البطل الشهيد
أمام مأجور وخائن!!

لــ فاروق جويدة



سوف نبقى هنا ..

كى يزول الالم ..
سوف نبقى هنا ..

سوف نحيــا هنــا .



راح احكى واحكى واحكى
يا سوريــا  لاتبكى 
ياسمين الشام مزهر... يعنى الحرية ملك
ى 



سوريــا حرة للابد
غصب عنك يا اسد 

بشار ابشر بالبوارى اقولها 
قد كان ربك شاهداً وحسيباً
-باللــه قل لي كيــف ترقــد آمنــا

ويــداك تهوى القتــل والتخريبـا

باللــه قل لي كيــف تهنأ لحظــة

والأمــر بات على العباد عصيبــا

هــلا تذكرت الحسـاب وساعــة

قد تجعل الولــدان فيــه مشيبــا

يا حمص... يا حلب .. يا درعا..  يا بابا عمرو
يا حماه .. يــا كل ســوريـــا 
الله مـعــك 

السبت، 7 يوليو، 2012

تهييس اخر الليل


باقدر جداً
الناس اللى بتحترم
رغبة غيرها فى انها تعمل /او ماتعملش
حاجة معينة لمجرد  بس ان التانى طلبها منه
حتى لو الحاجة دى هتسيب فى قلبه غُصًة
او مش على هواه بالبلدى يعنى
بس بيعملها رغما عنه
ارضاءا لرغبة التانى
حتى لو مفيش بينهم علاقة وطيدة
"اخدت بالك من وطيدة دى "
--
الناس دى بجد انا باحترمها جدا
ومن موقعى هذا احب اقولها شكرا جدا :)
--
وفى نهاية البرنامج
احب اهدى اغنية
ست الحناين يا حنانة انت
======
تهييس الساعة الثالثة الا عشرة دقائق
مفيش نوم !!
فى مطبخ عايز يتنظف :\
فى صالة عايزة تتروق :\
فى حاجات عايزة احضرها :\
..
محدش هيطلب منى انى اعمل الحاجات دى
عشان اعملها رغما عن انفى
وافرح بيا بقى بعدها واقدرنى وكده يعنى
:D
--
فى الخلفية اغنية
نحن لا نزرع الشوك :))
======
المسميات :-
تهييس ف اخر الليل
او استظراف :D
--
فى الخلفية الحقيقة :))
قرآن الفجر
:)

الجمعة، 6 يوليو، 2012

عنه :):




احببتك قبل ان اعرفك
افتقدك قبل ان القاك
كلمات هام بها خاطرى عندما شاهدت صورته
على جدران "جمعية صناع الحياة"

محمود سليمان 

لم اعرف عنه الكثير سوى انه كان من ضحايا
بلطجة وسفالة العسكر فى مذبحة بورسعيد
-----
محمود طالب فى كلية الهندسة
وهب حياته لخدمة الناس المحتاجة
فى رمضان كان هو المسئول عن اللجنة الخيرية
كان مسئول عن افطار الناس ف المواقف
اللى فى الشرقية
كل يوم يروح يجيب شوال البلح على كتفه
ويحط البلح فى الاكياس الصغيرة
ويفضل قاعد جنبه يقرأ قرآن
لحد قبل اذان المغرب بشوية
ويروح ع الموقف يوزع البلح
ويفطر الناس
محمود كان بيشيل هم الفلوس اللى هيجيب بيها شوال البلح
ومكانش بيهدى له بال الا لما يجمع المبلغ



انا معرفوش ... ملحقتش اقابله
مسمعتش صوته غير فى الفيديوهات
ماليش نصيب اشوف ابتسامته اللى كانت
بتهون على فريق صناع كل التعب اللى بيشوفوه
معرفتوش غير من الصور والجرافيتى اللى ع الحيطان
-----
يوم حملة "اوعى " حملة التوعية ضد الادمان والمخدرات
لاقيت بنوتة واقفة قدام بارتشن الحملة
على وشها بسمة بس مش كاملة
ولابسة اسود فى ابيض
روحت لها ولسه باعرفها على الحملة وهاحكى لها
قالتلى:- = انتى مش عرفانى ؟!
-انتى مش غريبة عليا حاسة انى شوفتك قبل كده
=انا اخت محمود
- محمود مين ؟!
=انا معاكم فى صناع
انا اخت محمود سليمان
وهى بتتكلم كانت بتشاور على الحيطة
بتشاور على الجرافيتى بتاعه
مرسوم فيه وشه وتحته
"محمود سليمان عايش فى الجنة "
ساعتها ملاقيتش نفسى غير فى حضنها
و بابكى اوى وبقولها انا آسفة
انا آسفة بجد
محمود كان السبب فى انى اجاى صناع اصلا
ربنا يرحمه
ساعتها هى اللى حضنتنى وطبطبت عليا
وقالتلى بتتاسفى على ايه يا حبيبتى
انتى بتكملى مشواره
------
محمود كان بيشجع الناس انها
تتطوع فى محو الامية
عشان تساعد الناس الغلبانة دى انها تقرأ
وتتعلم وتاخد حقها فى الحياة
حد كان بيدور على احلام الناس 
ويساعدهم فى تحقيقها
عمره ما كان عايش لنفسه
حد كان بيفكر فى غيره 
حد كنت باتمنى اقابله 
محمود
انا نازلة بكرة عشان انت قولت
ان من حقه يكون انسان
من حقه يحقق حلمه
من حقه يوصل
نازلة عشان اساعده زى ما قولت
نازلة بكرة وهاشوفك فى كل واحد
بيكلم الناس بحب وبيجمع اكبر عدد من الاميين
عشان يعلمهم
هاتخًيل ابتسامتك اللى ما شوفتهاش
هاتخيًلها فى وشوش الناس اللى هتبقى فرحانة بوجودنا معاها
تصدق انى مبطلتش اسمع الفيديو اللى فيه صوتك
ادعيلى اكون معاك هناك :")
----------
صديقي الحبيبُ
صنعْتَ الحياة
فغابتْ بِعُمْرِكْ شموسُ النـَّجاة
ونورٌ توارى بظُـلْمٍ ضِياه
أنا لا أرَاكَ مع الراحلينَ
فــلا يا صَديقي ولا لا
على الأرْضِ خلْقٌ تـَموتُ
وفوقَ الرحيلِ صُـنّاعُ الحياة .
******
أهالتْ يديّ عليكَ التُراب
فغامتْ عيوني بدمْعِ العذاب .
فمَنْ يقـْتلُ الذِكْرى
ومَن يسجنُ الشوقَ ،
مَنْ يُكْبتُ الدمعَ بالأهْدابْ؟؟
ومَنْ يمْحو طيْفاً بنورِ الحَبيبِ تـَجلّى
يُداعبْ زوايا الحُضورِ برغـْمِ الغِياب
******
سُليْمانُ ) يا لو حةً يرْسمُ الدّمعُ
وجْه الحنينِ المُعتّقْ عليْها .
ويازهـْرةً يُولدُ العِطْرُ فيها
وتدْنو فراشَاتُ ربّي إليْها
أ( محْمودُ ) كيف النعيمَ وأنـْتَ النعيمُ
وكيف الجنةَ وأنـْتَ لديْها ؟
فيا أُمًّ ( محْمودَ ) لا تجْزعي.
وصلّي لربّكِ ليْلاً
وعِـنـْد القِيامِ ارْكعي.
ففي الجنّةِ الْـلُقـْيا
فلا تدْمعي .
******
الرثاء : بقلم :  محمد فتحي الجابري

sona3 :)


يوم واحد هيفرق فى حياة مصر كلها

ومن أحيـــــاها ♥

تخيل ان كل حد عرف يقرأ بسببك

 كل حرف بيقرأه هيبقى فى ميزان حسناتك

لسه قدامك فرصة تبقى معانا يوم 7/7 يوم من اجل مصر

حلمنا ----> مصر بلا أميــة

وهنقدر باذن الله

http://www.youtube.com/watch?v=pmO6LHi5EXQ

الخميس، 5 يوليو، 2012

كفارة لما بينهما :-)


 أبي هريرة أن رسول الله صلى الله عليه وسلم قال الصلاة الخمس والجمعة إلى الجمعة ورمضان الى رمضان كفارة لما بينهن ما لم تغش الكبائر
صدق رسول الله صلى الله عليه وسلم
-----
اهو انا تقريبا هاكفًر عن ذنوب المدونة كل رمضان :D
مادخلتش هنا من 11 شهر بالظبط
كل شهر رمضان باجاى اكتب كلمتين واهرررب
بس وماله مايضرش
ادينا هنكتب وهننشر وهنقول
وكله بما لا يخالف شرع الله :D
وربنا ييسرها
----
باقلب فى الاجندة بتاعتى لاقيتنى كاتبة
"ضيفى العزيز : رمضان
اتفضل وانا ان شاء الله هاكرمك "
كانت محاولة منى انى استعد لشهر رمضان
واهيأ نفسويتى وروحانياتى وكده
عشان اغتنم كل دقيقة ف رمضان
ده اوكازيون يا جدع كل حاجة معمول فيها تخفيض
وكل ما تشترى تكسب
تجارة كسبانة كسبانة يعنى
----
رمضان بقى المرة دى هيبقى مختلف
هيبقى اول رمضان بعد العمرة :)
هيبقى اول رمضان على بياض
ادعى فيه ربنا بكل باقى الامنيات اللى عايزاها
وانا متاكدة انه هيحققها
"زى ما حقق لى امنية انى اطلع عمرة مع عيلتى قبل رمضان 2012 "
يعنى خلاص
حتة الشك ان ربنا ممكن ما يستجيبش ليا دعوة
"وده لظن منى انى مقصرة معاه فمش هيجيب لى "
خلاص انتهت
مابقتش افكر فيها تانى
ما انا خلاص جربت انى ادعى وانا متيقنة من الاجابة
متيقنة انه كاتب لى الخير اينما كان
متيقنة انه كريم ورحيم وغفور و ودود
متيقنة انه بيساعدنى عشان اعمل اى حاجة تقربنى منه
اصل انه يستجيب دعوتى ويرزقنى زيارة بيته
وييسر لى كل حاجة عشان ادعيه !
يعنى كأنه بيقولى انا عامل لك كل حاجة اهو عشان تدعينى
وعشان انا استجيب لك.. ملكيش حِجة بقى
يارب انا بحـب حضرتك جــدا .
----
اللهم سلمنا رمضان
وسلمنا الى رمضان
وتسلمه منا متقبلا
<3