الاثنين، 24 فبراير، 2014

احنا

إلى من ساقه قَدره إليّ :D
الحاج أبو العيال وكده
هذا ونظراَ لأنى لسه ماتوصلّتش لسبب ما يربطنى بيك
وخصوصا فى اوم الدنيا اللى قاعدين فيها دى ..
فانا فكرت فى شوية أشياء كده لعلّها تُسبب
فى الغالب والشئ اللى استحوذ على تفكيرى فى بداية الإجابة
هو انى عايزة حد احسن منى
الجملة المهروسة فى سبعتلاف مسلسل مصرى :
الوحيد اللى هابقى سعيد انه يكون أحسن منى هو ابنى !
-
مش فاهمة يعنى إيه وجه التعاسة لما تلاقى حد تعرفه يبقى أحسن منك ؟
ماعلينا
-
بس صِدقاً اللى فكرت فيه هو انى كنت محتاجة لشوية حاجات كده
ماعِرفتش اكفّى حاجتى ليا فقررت -بأنانية-انى اكفيّها لولادى
انا عندى قناعة تامة ان الأب والأم هما السبب فى نجاح او فشل الأبناء
-ولكل قاعدة شواذ- ، بس انا عارفة ومتيقنة ان صلاح الأبناء من صلاح الأبوين
مقتنعة تماماً ان الأب والأم لازم يتقنوا دورهم فى أول حياة عيالهم
لحد ما يوصلوا لسِن التفكير .. الوقت اللى يعرفوا يفكّروا فيه ويطلعوا بآراء مخالفة لارائهم ساعتها لازم يكفّوا أيديهم وألسنتهم عنهم
ويبقوا بس متفرجين اوبالأحرى  مستشارين .
دورهم فى بداية عمر عيالهم هو الأهم ..عشان هو ده حجر الأساس زى ما بيقولوا
فى طوبة وقعت بقى ولا الاسمنت مش تمام يبقى عليه العوض فى العمارة كلها
وعشان كده باحمّل الأبوين مسئولية فشل عيالهم ان ثبت إنهم قصّروا .

فكرة الإعداد دى صعبة وعايزة حد يتقنها .. ازاى اخلق له شخصيته
من غير ما اسيب بصمتى عليها
أيوة لازم ما تسيبش بصمتك عليها ، لازم نبطل بقى ثقافة
"انا ابوك وأدرى بمصلحتك" !
ماهو حضرتك لو كنت شاطر فى الإعداد ماكنش زمانك شايل همّ مصلحته لحد ما بقى شحط !

مش عارفة ليه كلامى قلب على محاضرة رياض أطفال كده !!
بس قشطة انا كل اللى عايزاه  عيالى يبقوا راضيين عنى .
انا معرفتش اكون حاجات كتير قوى .. وعايزاهم على قد مايقدروا
يكونوها أو على الأقل يجربوها .
مش عارفة دى أنانية ! ولا عجز ! ولا قصر ديل ؟

المهم انت دورك إيه بقى يا برنس فى الليلة الحلوة دى ؟
حضرتك اللى هتحط الاسمنت سعادتك
انا معنديش استعداد اشيل القوالب واعمل السقالة وانت قاعد
تشرب شاى وتقرأ جرنال !
هقول لهم إيه مثلاً ؟ ده سمسار جاى يعاين المكان ؟

ماينفعش تبقى عبارة عن خزنة بنكنوت متنقلة وشكراً على كده
فرقت إيه بقى عن الباقى ؟
يبقى هاتنيّل واتجوزك على إيه ان شاء الله ؟
يبقى نخلفهم ليه ولامؤاخذة ؟

معنديش أدنى استعداد اتحمّل ذنب نبتة تموت !
وعيالك نبتة هتتحاسب عليها

مش مُميّزة عشان اتقنعر عليك! .. قشطة والله موافقاك جداً
بس انا مش عايزة حد يتنقعر على ولادى .
لا انا ولا انت كاملين فى شخوصنا صح ؟!
نحاول نبقى متكاملين بقى ولا فالحين فى الكلام وبس ؟

المهم دلوقتى ان التفكير فى الإعداد مايوصلنيش للخوف منها .

الخميس، 16 يناير، 2014

إليها

تصدقى انِك وحشانى :)
بجد وحشانى قوى !
عارفة !! فى جُملة كده لايقة عليكِ انتِ وحبيبة
"عن الاشتياق بغير أملٍ فى اللقاء"
أهو انا كده انتو الاتنين وحشتونى وانا عارفة
انى مش هاشوفكم
معنديش سبيل للتعزية يعنى فبتوحشونى وبس :)
بالمناسبة انتِ عرفتى حبيبة ولا لسه ؟ :)
يارب تكونى قابلتيها
هى متعرفنيش بس انا نفسى تعرفنى
حبيبة دى حسيتها شبهك بس بشكل مطرقع شوية :D
هو انتِ صحيح موقفك من الانقلاب ايه ؟
عارفة انك بتكرهى السياسة واللى بيشتغلوها -_-
بس انتِ كنت هتنزلى مظاهرات معايا صح ؟
او على الأقل هتطمنى ماما وتثبتيها وتشرحى لها
يعنى ايه " إنا لله وإنا إليه راجعون " ؟
ماما بقت مُتعبة قوى على فكرة
بقت بتخاف كتير وبتعيط كتير ومابقتش بتتكلم معايا
ما علينا
بس تعرفى ! أحسن لك والله دلوقتى اللى انتِ فيه
انتِ ما بتحبيش التوهان والعك واللّف والدوران مش سِنو حياتك
واللى احنا فيه دلوقتى عز العكعكة آه والله
ومش عارفين هتتحل ازاى ؟
ليس لها من دون الله كاشفة
سيبك ..
المهم انك لازم تدورى على حبيبة وتقعدى معاها ^ـــ^
هتلاقيها مُثقفة وعارفة التاريخ الإسلامى وبتحبه زيك
قابليها بقى عشان تقوليلها ان انا عايزاها تشفع لى .

مش فاكرة قبل انهى امتحان .. -تقريبا المشتركة-
 ليه افتكرت كلامك اللى
كتبتهولى فى الاوتوجراف !!
"نفسى اعرف هتجيبى كام فى ثانوية عامة وهتدخلى كلية إيه ؟
وهتتجوزى مين وهتجيبى عيال قد إيه وهتدخليهم كليات ايه ؟
اوعى تدخليهم تجارة يا منار ليطلعوا فشلة زى خالتهم "

انا دخلت بيطرى وقولى يارب اخرج بقى :D
وفى حاجات حصلت لى فيها كتيير عايزة اخد رأيك فيها
انتِ عارفة انه هَبل صح :D بس رأيك هيفرق
على الأقل تطمنينى ان نسبة الهبل فى معدلها الطبيعى :D
انا بحكى لصاصا عموماً يعنى لا تقلقى
بس رغى البنات ليه رونقه برده ;)
بس مش مشكلة ربنا هيأجرُنا إن شاء الله

انا جاية عشان اقولك انا آسفة .. انا نسيت صوتك
انا فعلا نسيته .. معنديش اى تسجيلات ليكى
ومحاولتش ادور عشان محدش يشوفها ويشغلها ويتوجع
بس فاكرة حُضنك واحنا واقفين عند الثلاجة قبل ما تسافرى البلد
فاكرة لما قولتيلى " تحلى لك الدنيا يا منار"
انا بقيت بادعى الدعوة دى للناس اللى بحبها قوى
عارفة آخر مرة اتكلمتى معايا امتى ؟
فى أول وآخر حلم جيتى لى فيه
من 2006 الساعة 6 الصبح
مش فاكرة نَص كلامك بس انا صحيت من الحلم
وانتِ بتقوليلى هما مخضوضين ليه انا لسه هنا اهو
من ساعتها وانا معرفش عنك اى حاجة
وعارفة ان انا اللى مقصرة
ما انا لو بافكر فيكى كتير هحلم بيكى كتير
معلش الدنيا تلاهى
دنيا زبالة اساسا زبالة قوى
بقى كل همّنا فيها نموت ازاى ؟
والنيّة نظبطها ازاى وننظفها من السُمعة وكلام الناس !
قشطة بقى المهم انتِ كويسة
مش انتِ كويسة ؟ يارب تبقى فى الجنة
يارب تبقى مع حبيبة
يارب تقابلوا النبى
يارب ابقى معاكم 

السبت، 4 يناير، 2014

(هــ)

معاكِ ربنا أحسن من الكُل
# مها صبرى
قبل امتحان شفوى الفسيولوجى سنة ثانية
حيث الواسطة (الكوسة) تهب علينا من كل حدب وصوب !
-
ربنا يهديكِ وينوّر بصيرتك <3
يا منار يا بنت عمو صبرى
# فوزية السيد
فى المسجد لما قولت لها بحبك فى الله ووصيّتها بالدعاء
سنة رابعة
-
انا باتكاد منك ..عرفتى المشكلة غيّرى طريقة مذاكرتك
هتشلّينى :D
# مروة محمد
بعد العك فى كل امتحان :D
كل سنة :D
-
تعالى عايزاكِ فى حاجة كده !
امسكى يا منورتى :)
تطلع لى غويشة اكسسوار لون خرزها ازرق فى بمبى
هدية بدون أى مناسبة
# مها عبد العزيز
قبل سيكشن الولادة فى يوم خنيق
سنة خامسة الترم الاولانى
-
عامل إيه يا (باشا) ؟!
البت دى بتاخد وتدى فى التليفون وانا بحب العيال دى 
# منى على
واحنا مروّحين وبنجيب فى سيرة مروة 
سنة ثالثة
-
هتروحى المظاهرة ؟!
آه
استنى نصلى الظهر ونروح سوا
الواحد بيخاف يروح مايرجعش
يبقى آخر حاجة عملها انه صلى الفرض على الأقل
# فردوس
قبل اى مظاهرة ضد الانقلاب تحصل فى الكُلية
سنة خامسة الترم الاولانى
-
إزيك يا سُكر ؟ :)
انا بحب حجابك أوى وخصوصاً الأبيض
# كاريمان السيد
فى أى وقت -
كِبرتى يا منورتى وبقى بيجيلك عِرسان يا صغنن
وانا .. اعييييييييط
# مروة الاسيوطى
يوم الاثنين فى الميكروباص بعد سيكشن اللبن
سنة رابعة
-
بُصى انا فهمتها كده من الدكتور
مش عارفة كده صح ولا غلط
اسأليه برده
# فيروز
فى سيكشن الجراحة
سنة رابعة الترم التانى
-
المُحترم مش بالكلام
# ليلى عبده
لما كانت متضايقة من شخصية ما
فى محاضرة الشرعى
سنة رابعة
-
وانا لسه باقول هيييييييييه لما لاقيته بيسأل فى المقارنة !
اتاريه كان عايز التشابُه :D :D
# منار فكرى
فى امتحان شفوى اللحمة (مسخرة السنين)
سنة خامسة الترم الاولانى
-
ايه هى الـ oedema يا مروة ؟
fluid فى البتاع
# مروة محسن الشهيرة بـ tranqulizer السيكشن
واحنا بنذاكر باطنة
سنة رابعة
*****
انا بحب سيكشن (هـ)
"بنــات" سيكشن (هـ) :P
سميتُهم فى سرى ربانيّات :)
تقريبا أحسن بنات فى الدفعة كلها
مفيش حقد ولا نفسنة ولا غِش ولا نميمة
حتى فى الاختلافات السياسية فى حوار معقول على الأقل
ومحدش بيطلع منه خسران .
باختصار تطمنى وانتِ معاهم
محدش بيبخل عليكِ بحاجة ويساعدوكِ بصدر رحب
ومن غير ما يكونوا مستنين مصلحة قدام
أحبكن فى الله :)
و مُمتنة لكل موقف حصل بينى وبين أى منهُن واتعلّمت منه :)
شكراً