الخميس، 16 يناير 2014

إليها

تصدقى انِك وحشانى :)
بجد وحشانى قوى !
عارفة !! فى جُملة كده لايقة عليكِ انتِ وحبيبة
"عن الاشتياق بغير أملٍ فى اللقاء"
أهو انا كده انتو الاتنين وحشتونى وانا عارفة
انى مش هاشوفكم
معنديش سبيل للتعزية يعنى فبتوحشونى وبس :)
بالمناسبة انتِ عرفتى حبيبة ولا لسه ؟ :)
يارب تكونى قابلتيها
هى متعرفنيش بس انا نفسى تعرفنى
حبيبة دى حسيتها شبهك بس بشكل مطرقع شوية :D
هو انتِ صحيح موقفك من الانقلاب ايه ؟
عارفة انك بتكرهى السياسة واللى بيشتغلوها -_-
بس انتِ كنت هتنزلى مظاهرات معايا صح ؟
او على الأقل هتطمنى ماما وتثبتيها وتشرحى لها
يعنى ايه " إنا لله وإنا إليه راجعون " ؟
ماما بقت مُتعبة قوى على فكرة
بقت بتخاف كتير وبتعيط كتير ومابقتش بتتكلم معايا
ما علينا
بس تعرفى ! أحسن لك والله دلوقتى اللى انتِ فيه
انتِ ما بتحبيش التوهان والعك واللّف والدوران مش سِنو حياتك
واللى احنا فيه دلوقتى عز العكعكة آه والله
ومش عارفين هتتحل ازاى ؟
ليس لها من دون الله كاشفة
سيبك ..
المهم انك لازم تدورى على حبيبة وتقعدى معاها ^ـــ^
هتلاقيها مُثقفة وعارفة التاريخ الإسلامى وبتحبه زيك
قابليها بقى عشان تقوليلها ان انا عايزاها تشفع لى .

مش فاكرة قبل انهى امتحان .. -تقريبا المشتركة-
 ليه افتكرت كلامك اللى
كتبتهولى فى الاوتوجراف !!
"نفسى اعرف هتجيبى كام فى ثانوية عامة وهتدخلى كلية إيه ؟
وهتتجوزى مين وهتجيبى عيال قد إيه وهتدخليهم كليات ايه ؟
اوعى تدخليهم تجارة يا منار ليطلعوا فشلة زى خالتهم "

انا دخلت بيطرى وقولى يارب اخرج بقى :D
وفى حاجات حصلت لى فيها كتيير عايزة اخد رأيك فيها
انتِ عارفة انه هَبل صح :D بس رأيك هيفرق
على الأقل تطمنينى ان نسبة الهبل فى معدلها الطبيعى :D
انا بحكى لصاصا عموماً يعنى لا تقلقى
بس رغى البنات ليه رونقه برده ;)
بس مش مشكلة ربنا هيأجرُنا إن شاء الله

انا جاية عشان اقولك انا آسفة .. انا نسيت صوتك
انا فعلا نسيته .. معنديش اى تسجيلات ليكى
ومحاولتش ادور عشان محدش يشوفها ويشغلها ويتوجع
بس فاكرة حُضنك واحنا واقفين عند الثلاجة قبل ما تسافرى البلد
فاكرة لما قولتيلى " تحلى لك الدنيا يا منار"
انا بقيت بادعى الدعوة دى للناس اللى بحبها قوى
عارفة آخر مرة اتكلمتى معايا امتى ؟
فى أول وآخر حلم جيتى لى فيه
من 2006 الساعة 6 الصبح
مش فاكرة نَص كلامك بس انا صحيت من الحلم
وانتِ بتقوليلى هما مخضوضين ليه انا لسه هنا اهو
من ساعتها وانا معرفش عنك اى حاجة
وعارفة ان انا اللى مقصرة
ما انا لو بافكر فيكى كتير هحلم بيكى كتير
معلش الدنيا تلاهى
دنيا زبالة اساسا زبالة قوى
بقى كل همّنا فيها نموت ازاى ؟
والنيّة نظبطها ازاى وننظفها من السُمعة وكلام الناس !
قشطة بقى المهم انتِ كويسة
مش انتِ كويسة ؟ يارب تبقى فى الجنة
يارب تبقى مع حبيبة
يارب تقابلوا النبى
يارب ابقى معاكم