السبت، 20 مارس 2010

زغرطى يااللى ماانتيش غرمانة


بالله عليكم
حد ينجدنى ويجاوبنى حد
يرد على سؤالى
ولا يمكن انا اللى اتجننت
وانا مش داريانة بحالى
طب بالذمة الناس تروح فين
وتيجى منين
تروح فين بعد الازهر
يعنى زماان زمان
وقول للزمان ارجع
هيقولك تلاتة بالله العظيم ماانا راجع
نرجع لمرجوعنا
كنا بنقول ان زمان كانت الناس تخاف على عيالها
من المدارس الحكومية والخاصة وغيرها
ويروحوا للازهر
ايام برده ماكان ازهر
دلوقتى يروحوا فين
اما يبقى مدرس ازهرى بيعلم الدين والقران
يتحرش جنسيا بفتيات وفي ايه لسه
فى الابتدائية طب البنية تعمل ايه فى نفسها
طب اهلها هيكون حالتهم ايه بالذمة ده يرضى مين ياعالم
والله فئة المعلمين بريئة من هذا القذر
نروح فيين بعد كده
هو احنا عايشين فين ياناس
فى غابة مستوحشة ولا ايه بالظبط
هنروح فين
اما يكون كيلو اللحمة ب60جنيه
هتقولولى بلاها لحمة
اهو كترها برده بيجيب نقرص واحنا مش ناقصين
كفاية الضغط والسكر والقلب
وخشونة الفقرات وخشونة الركب
وحمى الضنك
ومش بعيد يبقى عما قريب يكون فى شلل اطفال كبار
عاااااااااادى
والمهم ان د/شهاب ولا مش عارفة اسمه ايه بتاع البياطرة حزين
والدكتور التانى بتاع رابطة مستوردين اللحوم حزين
لا حقيقى صعوبتوا عليا
طب هنروح فين
مين البوتاجاز واما يكون بنصدره للحلوة الامورة
الله يحرقها اسرائيل والله خسارة فيها اللون والكتابة اصلا
طب كفى حاجة شعبك الاول وبعد كده صدر ياعم الغنى
الواحد هيقول ايه ولا ايه
مش عارفين نقول
غير زغرطى ياللى ماانتيش غرمانة
ولا واهم حاجة فينا ايه بقى
ان احنا بنهيص فى الهيصة وكفاية علينا يوم واحد
عشان الغلا برده
كفاية يوم نصلى وندعى ونعمل مسيرة فى الجامعة
وخلاص على كده
ولا احنا عارفين ايه النهاية

وساعة مانقول نقاطع يقولك هى جت عليا
ماالكل بيشترى
وساعة مانقول انت دلوقتى اما بتشرب حاجة ساقعة
مقاطعة كأنك بتشرب دم طفل فلسطينى
يقولك طب عنده كام سنة

وزغرطى يااللى ماانتيش غرمانة


ملحوظة على جنب:-
انا قريت على كل تعليقات البوست اللى فات
وبجد باشكركم اووووى على تفااعلكم وتعاونكم معايا
وده دين اكيد هيجى اليوم وارده لكل واحد فيكم

بس اهم حاجة تعملوا ايه
تزغرطوووووووووا

هناك 29 تعليقًا:

كيكى عوووووو يقول...

لا دة انا هزغرط بالجامد اوى
لولوولولىىىىىىىىىىىىىىى
لولوولولىىىىىىىىىىىىىى
عووووووووووووو

حفيدة عرابى يقول...

ماليش دعوة انا تعليقى اتمسح
امرى لله نقول تانى

هو انت متأكدة انى لو زغرطت مش هغرم حاجة:)
بصى ياحبيبتى
احنا فى دنيا
لا فى جنة ولا فى غابة
يعنى عادى واحد يتخرج من الازهر واخلاقه مش تمام
ونفسوياته مش متظبطة
المهم القلب يكون خاشع ياأمى:)
المشكلة فى البلد دى غياب فكرة المحاسبة
انى اكون متأكدة انى لو غلطت هتحاسب ده بالاضافة لتربية الضمير هيغير حاجات كتير



اما موضوع اللحمة فأنا مش معاكم فى المقاطعة
زمان محمود السعدنى كتب مقالات جميلة فى مجلة الشباب اسمها تقريبا وداعا للطواجن

أما انا فمادام فى صدرى نفس يتردد
لن اقاطع حبيبتى:)
سلام يا ست الضاكتورة

هراء لا داعى له ..... يقول...

هو أنا بقيت موقن إن كل شعب بياخد حكامه على قد عمله و نيته

يعنى الحكومة دى مناسبة للشعب دا


تصرفات الشعب حتى بعيدا عن الحكومة تصرفات عالم ظلمة و غير عقلانين و جهلة و الدين مهان و مالوش قيمة حقيقية عندهم


يبقى حكام شعب زى دا عاملين إزاى ؟

ريمان يقول...

ههههههههههههههههههههههههههه


شر البليه ما يضحك


مش عارفه اقول ايه


هزغرط وخلاص زى كيكى


لولولولولىىىىىىىىىى


رلابنا يصلح حال البلد دى

قولى امين

زهور الامل يقول...

احنا المفروض نلطم ونصوت ونولول على حالنا المايل

نلطم على القدس وفلسطين واللي بيحصل فيهم
نلطم على خيرنا اللي بيتصدر لاسرائيل علشان تحارب بيه اخوانا الفلسطينين

نلطم على الغلاء اللي هيموت الناس

نلطم على التحرش والاغتصاب نتيجة وجود الافلام الاباحية اللي مابقاش فيها حيا ولا خشى والمواقع السافلة اللي مالية النت

يااااااااااه ده احنا لو بدأنا لطيم يبقى هنقطع وشنا

اقولك على حاجة..... تحياتي

زهرة(جنى)الاسلام يقول...

السلام عليكم
لن يهدم ابدا سوف نفدية بدمائنا
ندعوكم للدخول الى شات مونتى يوم21/3/2010
تمام الساعة العاشرة مساءا
من اجل نصرة المسجد الاقصى

بنت قلبى يقول...

منا لو زغرطت على حاجه فقعانى زى دى
انا الا هخسر
هخسر حرقه دمى وصوتى على مواقف ماتستهلشى
زى التصدير لااسرائيل
يانهاااااااار على حالنا
دحنا بقا عندنا مجاعا يا ااهل مصر
ما فيش غير حسى الله ونمع الوكيل على حالنا الا بقينا فيه والا الله اعلم هيحصل ايه فيه اكتر من كده
والنبى يا اختى انتى جيه مع اوجاع كتر عدنا عيشين فيها
وبرضو مش هعلك
ولوووووووولى

غير معرف يقول...

لولولووووووووووى

صوتى راح كفايه كدا

ههههههههههههههههه

adel يقول...

سؤال بسيط قوي

انتي مستغربة ليه من الموضوع ده !!!!

انا ليا اصحاب ازهرين بيسمعوني البدع و هنا في القاهرة من هاقولك محافظات :)

قلم رصاص يقول...

احنا مفروض منلومش الا نفوسنا
احنا محتاجين التغيير من تحت عشان نضمن التغيير من فوق يكون دائم ومستمر وليس عرضي يروح ويجي !

فيه مقوله حلوه اوي سمعتها من احد المشايخ لأبي تيميه بيقول فيها :

فساد الراعي من فساد الرعيه .

بس بردو انا مش مبرأ الراعي من افساد الرعيه واستزادتها فسادا على فسادها .. وعلى حد تعبير الأستاذ هيكل :

ان هذا النظام قد غير من جينات الشعب

طبعا هو يقصد انه علمنا الخنوع وثقافة الاستسلام للأمر الواقع وعدم التطلع لأي تغيييييييييييييير

________________

حزين جدا لحادث الازهر هذا
ومش لاقي تعليق اقوله على هذه التجاوزات التي اصبحت غير مبرره على الاطلاق .....

طب كنا واحنا بنتكلم عن مشكلة التحرش بقى يطلع لنا بعض الاصوات تقول لنا ان البنت المتبرجه هي السبب في تحرش الاخرين بيها واللي يقولنا دا كبت من اللي الناس فيه الخ الخ الخ

طب بقى في حالة المدرس دا ايه الحجه المره دي ؟

،،،،،،،،،،،،،،،،،،

من فضلك احترسي ، مصر ترجع الى الخلف

تقبلي مروري وتحيتي

د/ أحمد لاشين يقول...

اجمل ما في الموضوع
هو عودة الدكتورة الشابة لمدونتها
كنت احيانا بأحس من التدوينات السابقة بروح الكبار في السن
احيانا كما اسميها شيخوخة الشباب
لكن هذه المرة
عادت بيطرية ومش بايدي بالفعل

اوعي تشيبي قبل الاوان
متعجزيش ارجوك
بدون الامل والعمل فلن نكون بشر
وعايزين نعرف نتيجتك وترتيبك عالدفعة
عشان نقول فيه امل في الاجيال دي
والا هنفضل نتكلم بلا عمل

واكثر الناس انجازا هم المشغولون
واكثر الناس اهمالا هم من يدعون الانشغال
وحضرتك ان شاء الله هتكوني دائما منجزة ومشغولة ومزغرطة ومش غرمانة :):):)

بس بيقولوا في اصول الفقه قاعدة ذهبية
"انما الغنم بالغرم"
يعني اللي هيشتغل 4 ساعات هينول اجر 4 ساعات
واللي هيذاكر 10 ساعات هينول جزاء 10 ساعات
وكلما زاد العمل زاد الامل وزاد الجزاء
وكلما زاد الكسل نقص الامل وزاد البلاء

اكرمكم الله ويسر لكم

طهر فؤادك يقول...

السلام عليكم ورحمة الله وبركاتة

ربنا يكرمك يارب والمسلمين

والفرج قريب ان شاء الله

وبوستك جميل قوى بارك الله فيكى

أحمد زاهر يقول...

طيب أنا مش بعرف أزغرط حد يكون بيعرف يزغرطلى

غير معرف يقول...

السلام عليكم
ازيك يادكتوره
جزاكم الله خيرا على الموضوعات الجامده دي

فى الاول طبعا موضوع الازهر دى مصيبه
للاسف الازهر مش زي زمان
من بعد ما ضموه للحكومه فى الستينات وهو حالته بأت صعبه
وخصوصا انهم اخذوا الاوقاف بتاعته وقالوا احنا هانبقى نصرف عليه
فزمان كان الموضوع مختلف عن دلوقتى

ولازم طبعا يتم التعامل بقوه فى الموضوعات دي
التعليم عموما مش موضوع سهل ابدا


اما موضوع الاسعار فدي مصيبه تانيه
يعنى تلاقى الحاجات بتزيد بشكل رهيب
يقولوا الاسعار العالميه
طيب ما احنا ليه منزرعش ونصنع لنفسنا
هو احنا مستنيين ايه

وتلاقى البترول يرخص يقولوا دخل البلد قل وبالتالى لازم الاسعار تزيد
البترول يغلى يقولوا الاسعار برضه تزيد
طيب ليه

وبعد ده كله تلاقى العجب
نصدر الغاز للصهاينه شبه ببلاش
واحنا محتاجين ليه او حتى لتمنه الحقيقي لو صدرناه لبلد عاديه
وهى يعنى البلاد اللى فى العالم خلصت مفيش غير دول
والاعجب اننا نصدره ليهم ونصادر اى وقود بيحاولوا يهربوه لغزه ويقولوا مينفعش يدخل من المعبر
طيب يعنى ينفع يدخل للصهاينه ومينفعش يدخل للمحاصرين
حاجات عجيبه

معلش بالنسبه لموضوع المسيرات السلميه فى الجامعه فهى تعبير عن الرفض للاعمال الصهيونيه فى فلسطين
لكن طبعا المقاطعه شىء رئيسي واعتقد ان كتير من اللى بيعبروا عن رفضهم لجرائم الصهاينه بيقاطعوا

اصل برضه مينفعش يبقى الصهاينه ومعاهم الامريكان بيدعموهم بيعملوا ده كله فى الاقصى وفلسطين
واحنا برضه نشترى اكلهم وننفعهم
حاجه تغيظ

معلش طولت عليكي
اشكرك على كلامك
ربنا يكرمك دايما

beautiful mind يقول...

ايه يا دكتور
انتي اتعديتي من د ستيته ولا ايه
لالالالا
نهدي اللعب شويه
هي الحكومه يعني هتقطع نفسها
كله هايبقي تمام
بس كل واحد ينام في العسل
ويخليه في حاله
انا مش بعرف ازغرط
كان نفسي اشارك
اهىء اهىء

momken يقول...

اذا الايمان ضاع فلا امان
ولا دنيا لمن لم يحى دينه


ربنا سبحانه وتعالى توعد المؤمنين والمصلين

ليس كلهم طبعا

فقال تعالى
(ويل للمصلين الذين هم عن صلاتهم ساهون)

وقال تعالى

(قل هل ننابئكم بلاخسرين اعملاً الذين ضل سيعهم فى الحياه الدنيا وهم يحسبون انهم يحسنون صنعا)

صدق الله العظيم


الناس اتغيرت والاخلاق اتغيرت الثوابت اتبدلت


بوست رائع ومحزن


سورى انا مبعرفش ازعرت



تحياتى

شفـقــة و إحســــان يقول...

واللهى عندك حق ده احنا على كده وعلى كل المصايب دى هنزغرط للسنة اللى جاية
بس هنقول ايه هى دى مصر يا عبلة

غير معرف يقول...

لولوووووووووووووووووووووووووووولى

حلوة كده ولا اعلى صوتى كمان

لولولوللوووووووووووووووووووووووووووووووووووللللوووووووووووووووووى

كده كفاية زورى هيوجعنى واتضطر اجيب دوا وانتى عارفة بقى الدوا غلى

ليس فقيرا من يحب يقول...

هههههههههههههههههه

لولولولولولولولولولولولولولولولولى

الف مبروك

حلوة دى ولا زغرط تانى

ههههههههههه هم يضحك ويهم يضحك برده

اخبارك ايه قمرى يارب تكونى بخير

وحشااااااااااااااااانى جداااااااااا

ghorBty يقول...

لا حول ولا قوه الا بالله

ربنا يصلح الاحوال

احنا ناقصنا شئ واحد التقوى وبس

لو كل واحد خاف ربنا واستشعر معني الله الرقيب ما كنش دا هيبقى حالنا

بيطرية ومش بايدى يقول...

نرد على التعليقات لانكم وحشتونى جاااااااااااااااااااامد جدا جدا
والله ونفسى ارد عليكم من زمان بس الظروف بقى
ربنا يكرمكم كلكم
ويعينكم على اللى احنا فيه

ونبتدى ونرد على
كيكى عووو
زغرطك مقبولة يافندم ويارب يجى اليوم اللى محدش فيه يزغرط خاالص
بخخخخخخ ونورتينى ياقمراية




حفيدة عرابى
حبيبة قلبى وربنا المعبود وحشانى جدا
معلش هو البلوجر كده اما يكون مضروب بيرخم كلامك وصلنى وللاسف فى حاجات كتير محتاجة للتغير بس موت ياحمار زى مابيقولوا
واما موضوع اللحمة فهى مش حبيبتى خالص حبيها انتى براحتك بقى واشربى
سلام يا ولى عهد عرابى افندى






هراء لاداعى له
لا انا شايفة انه فى داعى منه وجامد جدا بس بيتهيألى ان مش كل الشعب كده وهو الشعب ده بقى ليه كده مش من حكامه اللى بيدسوا السم فى العسل يعنى هى الناس شافت حاجة عدلة ومامشيتش وراها وبعدين طب ما الحكام زيهم واكتر منهم كمان يعنى هذا الشبل من ذاك الاسد مافرقتش كتير
زى ماحفيدة عرابى قالت هو الموضوع كله موضوع ضمير ليس الا
ربنا يسترها على الايام القادمة
شرفتنى بالزيارة القصيرة دى







ريمان
ياالله والله وحشانى اوى يابنتى بالله عليكى ماتزعلى منى انا عارفة انى مقصرة بس حاسة انى فى قوقعة مدونتى وخلاص على كده مش بروح اى مدونات تانية والله ودى حاجة قرفانى بس مش بايدى يا اوختشى

زغرطى ومين مش هيزغرط ربنا يصلح حالنا وحال جميع المسلمين








زهور الامل
لالالالا عيب عليكى ده كده كلامك مش على اسمك خاااالص
ده انتى الامل تقومى تعملى كده لالا مش معاكى خالص تفتكرى بعد ما نقطع وشنا فى حاجة هتتغير طبعا لا
فخلينا نزغرط اوفر برده :))
ربنا يهدينا ومين عالم مايمكن المدونين اللى موجودين فى البلوجر هما اللى يغيروا مصر ويجيوا ولادهم وينقلوا مصر من الحضيض لاعلى السماوات
قولى امين وانوى على كده
واكيد ده هيحصل وقريب







زهرة (جنى )الاسلام
اولا نورتى المدونة ثانيا اكيد مش هيهدم واكيد هنفديه بكل مانملك
بس انا مش معاكى للدخول على شات عشان نحرر المسجد الاقصى او نعترض على هدمه يعنى احنا كده بنصلح غلط بغلط تانى ده رايى لو انتى شايفة حاجة تانية احب اسمع رايك
والاختلاف فى البط لا يفسد للوز صينية
تحياتى لك











بنت قلبى
اول زيارة صح
بس نورتينى اوى يا مسكر فعلا زى ماانتى قولتى حسبى الله ونعم الوكيل
بس دى مش كفاية لازم ننوى ونشجع بعضيشنا على التغير على الاقل تغير انفسنا وتربية الضماير ونصحصحه ونفتح عقولنا مش اخرتها نصعًب ونقول ياسلام سلم الكابتن بلية بيتكلم
تحياتى ياقمر















حنون
كفاية كفاية خلاص دى الزغروطة وصلت لاسبانيا الشمالية
فين دى على الخريطة معرفش
نورتى يا سكر






عادل
جواب بسيط اوووى
لان الطلبة عادى ممكن يحصل منهم افظع وافظع لانى متاكدة انهم بيروحوا الازهر مش عشان يتعلموا ويسمعوا الدين لالا ده هما بيشربوا العلم من بتوع القهاوى والبلطجية وغيرهم واهاليهم مطمنين عليهم انهم فى الازهر
بس ماتوقعش من مدرس انه يطلع منه حاجة زى كده مدرس دى كلمة تحمل معانى كتيرة اوى يا دولة ولا يمكن الكلمة كبيرة عندى انا بس ولا ايه
تصدق بالله انا حاسة انى تايهة وضايعة
اما تلاقينى ابقى قولها انى سألت عليها

منور بعد غياب طوووووووويل










قلم رصاص
ان هذا النظام قد غير من جينات الشعب
هو ده اللى كنت بحاول اوصله للاخ هراء بلا داعى بس لسه الشعب بخير
وزى ماقولت يمكن المدونين هما اللى يغيروا مصر وينقلوها للاحسن
كلامك وصلنى يافندم وعلى طول بستفيد من معايلك
تشكرات افندينا

بيطرية ومش بايدى يقول...

د/احمد لاشين
اجمل مافى الموضوع هو عودة حضرتك لزيارة المدونة وتشريفك لها بتعليقك الذى طالما يضفى عليها شيئا جديدا وهادفا وممتعا ومحفزا لعمل المزيد
بجد بجد الله يكرمك ويعزك يااااااااارب
ويرزقك ويحققلك كل اللى بتتمناه
بفتكر كلام حضرتك وانا بذاكر والله وبيحفزنى اكتر وربنا يسهلها علينا واعرف افرحكم ياااااااارب









طهر فؤادك
ربنا يطهر فؤادك كمان وكمان ويثبتك على الحق ويزيدك
يارب يكون الفرج قريب ياااارب
ربنا يعزك ويحفظك يارب










بن الخطاب
ااه نأسف فمادام لايمكن ان تزغرط لا يمكنك المرور
من فضلك حاول مرة اخرى:))))






م/محمود فوزى
اولا منور بتعليقاتك الجامدة جدا جدا
واحلى حاجة عندنا كتر المصايب لا وايه بترف ورا بعضها
هو انا كان قصدى على المسيرات دى مش ان انا اعيب فيها لأ بالعكس ده انا كان نفسى اروح فيها بس هى مش فى كليتى اصلا وماكنتش اعرف
بس كل ما فى الموضوع ان الشباب فى وقت الشدة يتجمعوا ويعملوا حاجة حلوة وبعدها خلاص ينفضوا ولا كأنهم عملوا حاجة هو ده اللى مضايقنى ربنا يهدينى ويهديهم قول آآمين
ولا طولت ولا حاجة
من سيادتكم نستفيد
تحياتى









beautiful mind
ولا اتعديت ولا حاجة د/ستيتة ربنا يعينها بلغها سلامى بالله عليك
صح كلامك كله حكم ياراجل
احنا نام ونشخر شخير محترم واحنا نبقى مبسوطين واخر السطة
ابقى هات لى عيش وحلاوة وابقى ادعيلى بقى
ياسيدى ادفع انت فلوس واحنا نزغرط مكانك ماهى كل حاجة دلوقتى بالفلوس
اشترى راحتك برده

تحياتى












ممكن
كلامك وصلنى ونورت المدونة يافندم والايات توجع اوى ربنا يستر ومانكنش منهم ياااارب
ربنا يكرمك ويعزك يااارب
ولا يهمك ازغرطلك انا
تحياتى لك ايضا








شفقة واحسان
والله وحشتونى جدا جدا جدا
المدونة مالهاش طعم من غيركم ماتغيبوش عنها تانى
لا على فكرة ان شاء الله مصر عبلة هتشوفها فى شكل تانى وقريب اوى
وهنقولها بجد هى دى مصر كما انزلت ياعبلة
تحياتى











star in the sky
لا ده انا سمعتها وانا عند الجيران كفاية كده
لا ماتغلبيش نفسك
دواكى عندى يا حبيبتى
:))))))))















رانيا
وانتى كمان وحشانى اوووووووى
الله يبارك فيكى
شوفتى الهنا اللى احنا فيه يااوختشى

انا الحمد لله بخير طول ماانتى بخير

الله يكرمك ويخليك ليا يارب










غربتى
يارب ارزقنا التقوى يارب واكرمنا واعزنا بالاسلام واعز الاسلام بنا
نورتى المدونة ياقندم فى اول زيارة وياريت تتكرر

تحياتى

غير معرف يقول...

السلام عليكم
ازيك يادكتوره
جزاكم الله خيرا على كلامك الجميل
واسف للتاخر فى المتابعه لانشغالات
اتفق معكي فى انه يجب الاستمراريه فى العمل فمثلا الاستمرار فى موضوع المقاطعه وليس مجرد شهر وانتهى الامر
ربنا يصلح الاحوال
ربنا يكرمك ويوفقك

د/ أحمد لاشين يقول...

في انتظار جديدك
وفي انتظار نتيجتك
وربنا يعينك ولو مذاكرتيش كويس وكان التقدير افضل في التيرم التاني
هنزعل ونخاصم المدونة والمدونة كمان
شدي حيلك وربنا يعينك ويكرمك

حصان المرجيحة يقول...

يا خبر ابيض
هو ده عندنا في بلدنا
مش ممكن
اكيد تقصدي بلد تانية
ههههههههههههه
بمناسبة انك بيطرية
انا بشتغل في شركة ادوية بيطرية
لو عايزة حاجة قوليلي
ههههههههههه
تقبلي مروري

كلمة صدق يقول...

السلام عليكم قطتى الصغيرة طبعا زمانك نستينى علشان انت لابتسألى ولا حاجة المهمعايز اقولك ان شعبنا الغلبان طول عمرةبيزغرط وخلاص على وزيرالرياضة الي مسكوة الاعلام وازراعة يمسك تجارة والصحة يمسك مواصلات واهى ماشية بلد شهادات وخلاص وبالنسبة للحمة فى ناس مقطعاها من زمان بس غصب عنهم الناس المطحونين اللى عايشين ومش عايشين وناسيين الفرحة من سنين اقولك مش مكمل وربك هوة المعين وشكرا

غير معرف يقول...

السلام عليكم
ازيك يادكتوره
انتى فين من زمان
واضح انك مشغوله فى الدراسه
ربنا يعينك ويوفقك
يارب النتيجه السنه دي تبقى كلها امتيازات
ربنا يكرمك ويوفقك

طهر فؤادك يقول...

السلام عليكم ورحمة الله وبركاتة

اخبارك اية
عندى خير ليكوااا ان شاء الله كبير بأذن الله تعالى فية جمعية يااشباب لرعاية مرضى السرطان ومحتاجة دعمكم يااشباب عن طريق نشر حسابات الجمعية المعترف بيها من الجهات الحكومية لانها فعلا بتساعد ناس كتير من مرضى السرطان وكمان عائلتهم وكمان فية اهتمام اكبر بمستشفى 57357 وفية اهتمام اعلامى كبير بيها فياريت نساعد بعض فى مساعدة الجمعية "الامل فرع سوهاج "علشان تساعد ناس اكتر من المرضى كمان قال رسولنا العظيم فى حديثة :-
أتى النبي صلى الله عليه وسلم رجل يستحمله فلم يجد عنده ما يتحمله فدله على آخر فحمله فأتى النبي صلى الله عليه وسلم فأخبره فقال إن الدال على الخير كفاعله

** فياريت ياشباب نتبرع ولو بجنية علشان نساعد الجمعية دى وننشرها اكتر على جميع الناس والتبرعين .واليكم ارقام الحسابات

بنك فيصل الاسلامي 26270 فرع سوهاج

البنك الاهلى 734626 فرع سوهاج

البريد المصري 152077 فرع سوهاج

باسم جمعية الامل لرعاية مرضى السرطان

ودة ميل نائب مدير الجمعية لاى استفسار ومساعدة :---

g.elamal@yahoo.com


وقال صلى الله عليه وسلم : " إذا مات ابن آدم انقطع عمله إلا من ثلاث صدقة جارية ، أو علم ينتفع به ، أو ولد صالح يدعو له "

خليها صدقة جارية يااشباب وسااعدونا الله يكرمكواااااااااااا

الرجاء النشر

a7med-Mado يقول...

طيب والولد اللى مبيعرفش يزغرط يعمل إية
أنا متفق جدا مع حفيدة عرابى فى الكومينت بتاعها وكنت هقول نفس كلامها بس علشان أنا مش رغاى وهى وفرت عليا ف مش هرغى كتير

عموما ربنا يهدى الجميع

أسف لتغيبى عن مدونتك بس إن شاء الله متابعك على طول