الاثنين، 30 أغسطس 2010

اخيرا اتحقق

نبتدى منين الحكاية
نبدا بالسلام الاول
سلام عليكم يااجمل ناس 
واجدع شباب فى جمهوريتنا المبجلة
لو قعدت من هنا لحد كمان بوستين تلاتة اربعة خمسة
عشان اقول اخيرا شوفت الناس اللى بتفرحنى على الفيس
وعلى المدونة وبتحسسنى ان الدنيا لسه فيها امان وخيير كتيير اوووى
مش مصدقة ان الحلم اللى كان بيراودنى من اول مادخلت التدوين
وكل لقاء اقول امتى بقى يجى اليوم واروح
واهو جه ياولاد اهو جه ياولاد
احلى يوم فى احلى شهر فى حياتى كلها
اولا:توهنا شوية قبل ما نوصل وفطسنا من الحر
بس وصلنا على بركة الله 
دخلنا مكان التجمع ولاقيت 2 قمرات واقفين جمب بعضيهم
ورا المكتب وكلهم نشاط وجمال
الا وهم أ/داليا  قوس قزح
خيرة بطريقة غير عادية وتعبت فعلا فى التنظيم وتوزيع الحاجة
حبوبة اووى ورحبت بينا بشكل غير عادى
وفرحت جدا اما شوفتها
الام الروحية لينا كلنا فاتيما
طمطم وتيما والقمر كله
حنينة اووووى فاقت كل تخيالاتى وتوقعاتى والا الحضونات
بقى والبوسات اللى اخدتها تكفينى سنة قدام:)
اشاسا لو قعدت اتكلم من هنا لبكرة مش هاعرف اوصف احساسى
تجاه الاتنين دول

كان جمبهم بقى واحدة زى السكر ماكنتش اعرفها الصراحة
بس معرفتها كلها خير
م/ساجى
كانت بتنظم معانا  اللعب والهدوم وتعبت معانا فى الطلوع والنزول واللف
فى الادوار وكانت عزمانى على عربيتها عشان نروح المطعم
عشان كنت مكسحة تقريبا
بس كلام فى سركم بكسف
كان نفسى اسلم عليها قبل ماامشى بس هى كانت مشغولة 
وانا كمان كنت متاخرة اووى تتعوض ياسوسو
ويندا
مش هاعرف اقول حاجة عنها
كلهم قبلى وصفها وصف تستحقه بس شقاوة البنوتة
المصرية الحبوبة وشياكة .....
مش هاعرف اقول كمان
يمكن هى متعرفنيش بس كفاية انى عرفتها
وعلى الصعيد الاخر
عمهم كلهم
الاستاذ خالد همس الاحباب
حينما تذكر الشهامة والجدعنة ذكر استاذنا
تعب تعب بجد وفضل ياعينى واقف على حيله فى المطعم
لحد مااطمن على كل واحد ان وجبته واصلتله
تقريبا كده مفطرش ولا اكل حاجة
بجد اتشرفت جدا انى عرفته 
من الناس اللى تعمل الخير وترميه البحر 
ربنا يبارك فيه يارب ويخليه لهمس وشابى


أ/شيرين 
راجل وقور وطيب وشيك وجميل كفاية انه جه وشاركنا
احلى لحظات حياتنا واضفى عليها شيئا من الجمال
ملحقتش اعرف عنه الكتير 
بس كفاية انه كان منور ترابيزتنا اللى فى المطعم
كان فى اتنين معانا بيلفوا معانا ساعة ماكنا
بنوزع الشنط على الاطفال 
كان عندى احساس ان هما بس متاكدتش غير
اما رجعت ربنا يبارك فيهم ويخليهم لبعض
شفقة واحسان
والبقية تأتى من 
الشباب الصاعد طب والله شبابنا بخير 
يأتى فى المقدمة
أ/ضياء والعقل الراجح
رجل طويل والرجال الطوال قليل :D
ربنا يكرمه ويبسطه كمان وكمان
شاب فقرى 
نشاط وطيبة وجدعنة مع الكل
عادل البلد دى فيها حكومة
جه فى الاخر بعد ماخلصنا توزيع
غرامة تربنتاشر جنية
طبعا فى كتير يستحق التقدير والاحترام
انا ماكنتش اعرفهم من على المدونات
بس هما ناس كمل والله
من اول استاذ( وليد الدوغرى)
والاستاذ(مصطفى ريان)
وغيرهم اكيد اللى انا معرفهمش
بس بجد اجمل ناس شوفتها 
وفخورة انى قبلتهم
حلويات اللقاء بقى
القمرات اللى نوروا الدنيا كلها
واتبسطت انى قابلتهم
منونة القمرر السكر
فعلا يامنونة الصور شبهك
بجد انا فرحت اوى انى شفتك 
وماكنتش هاعرف انك موجودة لولا شاب فقرى
اكرمه الله
وطبعا تؤامك المتأخى
كيارا 
الدبوس ماوقعش ياكوكو:D
كنا مع بعض ف التوزيع ومعرفناش بعض
وقعدنا نشبه من بعيد
وطبعا قمرى وسكرتى وعسولتى
كيكى عووووو
العوووو بتاعتك ليها طعم تانى خالص
غير كل العووات اللى عرفتها قبل كده
اتشرفت بيكى ياقمر
ده غير
*رودى النشيطة الجميلة اللى مابطلتش حركة 
تعبت اووى ربنا يزيدك
*سونى 2000
قمرررر ومرحة وحبوبة
لحد دلوقتى معرفناش انتى جمعتنيا النهاردة ليه
سعيدة بجد انى شوفتك
موبايلات بقى هه مبوء باى
*فاطمة هادية اووى وسكر اووى
ربنا يكرمك يارب وتدخلى الكلية اللى نفسك فيها
*بنات المنيا
قمرات وروحهم حلوة ونوروا الترابيزة 
وضحكنا ضوحك كتييير 
بنات بجد زى السكر 
نوران
خيخية كنا حاسين انها هى 
شقاوتها فى المدونة هى نفسها اللى على الحقيقة
بس ملحقتش اسلم عليها لانى عرفتها فى اخر اللقاء
على بال ماسلمت على الباقى
كانت هى مشيت


فخووووووووووورة اووووى انى كنت معاهم 
احلى يوم قضيته فى حياتى ومش هانساه ماحييت

ملحوظة على جنب
طول البوست قاعدة بقول احنا احنا وكنا
حرف النون ده يعنى انا وحفيدة عرابى عرابية اصيلة
اشاسا لولاها ماكنتش جيت ولا روحت فى حتة
شجعتنى وونستنى وكفاية انها خلتنى افرح واتبسط
ويبقى عندى ذكريات حلوة افتكرها
يارب يخليها ليا ويكرمها دنيا واخرة

بس ودمتم
محدش يزعل منى لو مقولتش اسمه
الزوهيمر بقى

هناك 29 تعليقًا:

شمس النهار يقول...

:)))
فعر كل الناس دي ناس جميلة

وتحسي انهم بيعملوا الخير من قلوبهم

اللمة حلوة وخصوصا لما تكون القلوب صافيه

كل سنة وانتي طيبه

رمضان كريم


تحياتي

قلم رصاص يقول...

كل سنه وانتي طيبه
والحمدلله ان اللقاء كان رائع الى هذا الحد
كنت اتمنى احضر لكن تتعوض ان شاء الله

في ميزان حسناتكم يارب ان شاء الله

دمتم على خير

فاتيما يقول...

زوهيمر ايه دنتى كدا زى الفل
دنا لولا بكتب الأسامى كنت نسيت اسمى


انا هستخدم احنا برضو
عشان متهيألى الكل مشاركنى الفرحة دى

احنا اللى اتشرفنا بيكم يا حبيبتى
بجد انتى و فيدووو كنتو مفاجأة اكتر من هايلة
و لن نتنازل عن مجييكم اللقاء الحريمى و كل لقاء تدوينى عام او خاص

بجد
انتوا فرقتوا عند الناس كلها
حتى لو ملحقتوش تتكلموا مع الكل
بس عادة الأعداد الكبيرة مبتخليش حد يلحق قوى يحكى مع كل اللى بيحبوهم
و فيه ناس بتيجى و تمشى و متعرفش ان حد بتحبه كان موجود و كدا


عقبال كل سنة و انتوا معانا
انتوا نورتوناااااااااااااااااا
و بحبك قوى
و البوسات و الحضونات لسه فيه منها كتيييييييييير بس انتى تعالى خديهم يا توتى

بحبك يا صاحبة اجمل ابتسامة

мαησηα يقول...

يا اللى انتى ملاك ومش بايدك يا ست البنات انتى جميلة خاااالص
عايزة اقولك كنتى لافتة انتباهى اوى

انا كان نفسى ابقى زيك كده هادية وحلوة وكميلة كده وف نفس الوقت دمك خفيف اوى

انا بمووت فيكى بجد والله العظيم

ومبسوطة اوى اوى اوى انى شوفتك وعرفتك
كنت هازعل اوى لو كنت اكتشفت انك موجودة ومش سلمت عليكى

وميرسى ع بونبونايتك الحلوة اوى اوى دى

انا احبك اوى

همسات وبحــ الحياه ــر يقول...

طبعا نداله ملهاش حد

بيطرية ومش بايدى يقول...

شمس النهار
كان نفسى تكونى معانا
عندك حق فعلا
كلها ناس قلوبهم صافية ومليانة خير
وبيوروا لبعض احلى مافيهم
وانتى بالف صحة وسلامة
الله اكرم ياقمر

بيطرية ومش بايدى يقول...

قلم رصاص
بجد بجد فعلا القاعدة كانت ناقصاك
بس موجود معانا بحسك وبقلبك
يارب يجمعنا على خير يارب
وانت بالف صحة وسلامة

دمت ايضا بكل ود وبكل خير وسعادة وصحة

بيطرية ومش بايدى يقول...

فاتيما
يانهارى المدونة نورت بجد
لا كده كتير عليا هناك وهنا كمان

يارب دايما نتجمع على الخير والحب يااجمل فاتيما عرفتها فى حياتى
ويقدرك على فعل الخير
عارفة انك تعبتى انتى وووش الخير والاستاذ خالد بجد ربنا يجعله فى ميزان حسناتكم
يارب
ويارب تتكرر تانى وتالت وعاشر كمان
ويارب يديمها محبة لله وفى الله

وانا لازم هاجى عشان البوسات والحضونااات الجامدة اوى دى

وانا بمووووت فيك وربنا اللى عالم
نورتينى
بجد مش عارفة اقولك ايه

بيطرية ومش بايدى يقول...

منونتى
انتى القمر اصلا يقوموه ويقولك اقعدى مكانه ماتتعتعيش من مطرحك
لان اصلا من قبل مااعرف ان انتى هو انتى كنتى مدية اللقاء اصلا جو غير عادى
يارب يسعدك ياحبيتى ويحبب فيكى خلقه كمان وكمان ويطمن قلبك على طول

انا بموووووووت فيكى
والبونبوناية اصلا كتبتها وانا مستعجلة اووى فكتبت كلمتين كده على السريع
بس والله مايكفيكى وماوصفش اى حاجة حبى ليكى
دمتى بالف خير وصحة وسعادة يااااارب

بيطرية ومش بايدى يقول...

انا عارفة يادموع القمر
انها ندالة
بس تصدقى وتؤمنى بالله
انا لحد ماروحت مصر عند فيدوو
ماكنتش عارفة هاروح ولا لأ
حوار طويل هابقى احكيلك عليه بعدين
بس بجد انا روحت بالضالين
بعد ماشوفت الامرين والله
:وش مكثوووف مش عارف يقول حاجة:

sony2000 يقول...

اسميييييييييي مكتوب
ايون
تيب:)
بجد اتسطت اني عرفتك واتكلمت معاكي
وباذن الله لنا لقاء طويييييييييل
المره اللي جيه

وهبقي اقولكو جمعتكو ليه

Kiara يقول...

انتي بجد ماشاء الله الله واكبر عليكي بدر في ليلة تمامه كمان

وعاوزه اسالك انتي مين بس كنت مكسوفه فعماله اشبه بس وكمان كان عندي احساس اني شفتك قبل كدا وانبسطت اووووووي اني اتعرفت عليكي

بس اختك بئا معلش في السؤال الزهيمر لعب لعبته معايا هشوف شغلي معاه

بس هو دبوس ايه ؟؟؟؟؟؟؟؟

هههههههههههههههههه

والله انتي ثكر وانا حبيتك خالث وان شاء الله نشوف بعض كتييييييييير

صيدلانيه طالعه نازله يقول...

انا بقى كان نفسى اشوفك اوى يا قمر
معلش بقلى تتعوض اللقاءات الجايه
الناس دى كلها احلى من بعض و انا اتشرفت انى قابلت الناس دى كلها تقريبا
كلهم احلى و اجمل و اروع الشخصيات
كل سنه و انتى طيبه يا قمر و كل لقاء و انتى طيبه

كيكى عوووووو يقول...

والله بقالى نص ساعه متنحه مش عارفة اقولك ايه!!!!
انتى شوفتى رد فعلى طبيعى اون لاين كده
مممممممممممممممممممم
بس انتى ماشاء الله عليكى بجد
والله والله
راااااااااح منى الكلام
ياجودعااااااااااااااااااااان
جبتلى شيكولاته كادبورى ساااااده
علبه
انا فخوره بيهااااااااااااااااااا
خلصت فى يومان ياقلبى
بخلصها فى يوم بس الشعب التدوينى كان كلوا عينه فيها
عشان كده اتحسدت وكلتها ع يومان!!!
عووووووووووووووووووو
عوووووووووووووو

إيمان هلال يقول...

فى ميزان حسانتك إن شاء الله

صوت من مصر يقول...

عارفه فعلا كان يوم هايل وانطباعك على الناس ده لوحده جميل جدا

بيطرية ومش بايدى يقول...

سونى2000
وانا اقدر برده انساك ياجميل
انتى نورتينى وفرحتينى بمعرفتك
وان شاء الله معرفة كلها حب وخير ومودة وسعادة يااااااااارب
يديمها
يارب نتقابل على خييير

بيطرية ومش بايدى يقول...

كيارا
اهو انتى بقى اللى بدر وستين بدر وقمر كمان يارب يجمعنا دايما على الحب فيه
هاقولك مش فاركة ساعتة ماكنانازلين
من فوق وانا كنت ماشية وراكى لاقيت دبوس او اتهيالى انه دبوس فى الطرحة وانا عندى عقدة من الدبابيس اللى بتقع فقولت الحق الجريمة قبل ماتحدث فظبته
ونتيجة لانقاذ الموقف خضيتك
افتكرتى ؟؟
نورتينى ياقمر واسفة على الخضة:))

بيطرية ومش بايدى يقول...

الدكتورة المبجلة
صيدلانية طالعة نازلة
انا بجد اللى كان نفسى اشوفك وبقيت زعلانة عشانك وعرابية وصلت السلام لفاتيما اول ما وصلنا يعنى طازة بطازة
ان شاء الله تتعوض ونتقابل فى اقرب فرصة
وتكون احلى فرصة كمان
ربنا يكرمك يارب ويجمعنا على خير
وانتى بالف صحة وسلامة وخير وسعادة

بيطرية ومش بايدى يقول...

كيكى عووووو
ياحبيبتى ماتقوليش اى حاجة
ده اقل واجب حاجة كده بسيطة عشان معزتك عندى والله اعلم بيها
ربنا يكرمك ياقمرى ويفتحها عليكى من وسع ويزيدك حب الناس كمان وكمان

بيطرية ومش بايدى يقول...

اعقل مجنونة عندنا
يامرحبا يامرحبا مش مصدقة نفسى والله
نورتى اامدونة ياجميل
ربنا يكرمك يارب ويكتبلك الخييير
نورتى الحبة الصغيرين دوول

بيطرية ومش بايدى يقول...

صوت من مصر
اللقاء نور بوجود حضرتك
ربنا يجعله فى ميزان حسناتك
ويجمعنا على الخير يارب

سندباد يقول...

ربنا دايما يجمعكم في الخير وللخير
جزاكم الله خيرا وجعله في ميزان حسناتكم
تحياتي الخالصة

طوبه فضه وطوبه دهب يقول...

ربنا يكرمكم ويقدركم ديما على فعل الخير

بيطرية ومش بايدى يقول...

سندباد
اللهم آآآآآآآآميــــــــن
ويجازيك مثله وافضل منه ان شاء الله
شكرا لمرورك
تحياتى لك ايضا

شمس النهار يقول...

انا كمان كان نفسي اكون معاكم بس مجبسه رجلي
:))

ان شاء الله هنعمل الموضوع ده كل شهر
تعالي عندي المدونة وكمان ادخلي التعليقات هتلاقي التفاصيل

تحياتي

Kiara يقول...

ههههههههههههههههههههههه

اصل انا بتخض من اقل حااااااااجه

والله يابنتي كنت بشبه عليكي بس مكثوفة اجي اسالك :)

وبعدين انتي ماشاء الله عليكي ربنا يحميكي اجمل بنوته ياقمر وقمر ومليون قمر بئا ربنا يحرسك يارب

momken يقول...

كل سنه وانتى طيبه يا دكتور

انا عارف انك كنتى زعلانه من موقف الفيس بوك بس انا ماليش ذنب بس اعتقد انى اخدت حقك وعملت الواجب

اما عن الموقف نفسه فده مش طبعى
لكن عن الدين مقدرش اسكت
وهناك من يفسرون الصمت خطأ

المهم
كل سنه وحضرتك طيبه



تحياتى

a7med-Mado يقول...

الله يسهله ياعم
أنا كمان نفسى أروح مشوار زى دة أو أحضر لقاء مدونين أو أى حاجة زى دى
بس المشكلة إنى معرفش حاجة عن أى حاجة ف أى حاجة
ويابختك بجد وربنا يجعله ف ميزان حساناتك
كل سنة وإنتى طيبة