لاقيتك .

لاقيتك ........ مش انا لاقيتك !


* لاقيتك فى خروجة صحاب وانتى عاملة فيها مامتهم وبتعديهم الشارع وبتنقى لهم الحاجة الحلوة اللى هياكلوها

* فى حضن حضنتيه لماماتك ساعة ما اتسرقت منها الشنطة 
وحضنتيها جامد وهى بكت اوى ف حضنك وكأنها كان نفسها تبكى فيه من زمان 

* لاقيتك ف هزار مع اخوك بيقلب بتهييس غريب ولذيذ وبتصوريه كمان وانتو مهيسيين 

* لاقيتك ساعة اما بتشاكسى باباكى ف نقاش سياسى او نقاش عن اى حاجة 
اينعم صوتك عالى وبتتنرفزى وبتقاوحى معاه كتير وهو مسميكى ست الواعظة بس بيبقى نقاش حلو وبينفعك وبيديكى خبرة

* لاقيتك وانتى بتموتى فى حاجة اسمها العمل التطوعى وبتشاركى فى اى حاجة فيها خير وانتى بتجاهدى فى نفسك من جوه علشان النية تبقى خالصة لوجه الله مش لحد تانى

* لاقيتك وانتى بتدعى ربنا يارب طمنى انك قبلتنى ورضيت عنى 
يارب ابعتلى اى حاجة تخلينى احس انك بتبص لى وحضرتك مبسوط

* لاقيتك وانت مقتنعة بفكرة بتبقى مقتنعة بيها حتى النخاع وشارباها شرب كده وبتتقنى اوى فى اى حاجة عشان تدعمى الفكرة دى

* لاقيتك وانتى بتحبيهم اوى وبتبصى لهم بابتسامة دافية عمرك ما ابتسمتيها لحد واتعلمتيها فيهم وليهم 
وانتى بتدورى على كل حاجة بيعملوها وتقلديهم وعايزة توصلى لمستواهم ونفسك اوى تبقى شبههم كلهم من كتر ما كلهم حلوين 

* لاقيتك وانتى مسهمة ف محاضرة وفاتحة بوقك من كتر ما انتى مش فاهمة حاجة ولو الدكتور كويس بتصطادى الحكم والعبر اللى بيقولها ف وسط المحاضرة -ساعة اما بيهزق طالب-وتدوينها ف اول ورقة ف كتاب المادة 

* وانتى وشك احمـــر وبتعرقى جدااا وايديكى بترتعش ساعة ما بتيجى تتكلمى مع حد من الجنس الاخر 
 كتير بتبقى طروبش ف الكلام وساعات بتبقى مدب كمان وبطيخة ف الكلام خالص وساعات بيطلع منك حكم (سبحان الله)

* وانتى اول مرة تطلعى على الstage 
بتاع المحاضرات ووقفتى ومسكتى المايك واتكلمتى مع عيال دفعتك عن حملة اوعى ضد المخدرات كنتى بالعة المايك اصلا مع ان صوتك عالى لوحده ويرج اجدعها مدرج ومكانش معاكى ورقة ولا كنتى محضرة اصلا وطقت ف دماغك الفكرة ساعتها واخدتيها تحدى ومغامرة مع صاحبتك اللى قالتلك ماتطلعى هو حد حايشك
واتكلمتى كتير وقولتى كلام كويس واما لاقيتى صوتهم عالى وبيعملوا دوشة 
لفتى نظرهم وسألتيهم عايزنى اكمل ولا انزل وماكملش؟؟ 
ردوا عليكى بعضهم بالصوت والاشارة "كملى كملى"


* وانتى قاعدة جمب اخوك التعبان وبتعيطى وبتبحلقى ف وشه وبتقوليله :- انت ازاى بتستحملنى وانا متعصبة وانت تعبان كده 
ازاى انا قاسية كده عليك ومش قادرة احط نفسى مكانك 
مش قادرة اتخيل ان حباية الدوا دى هى اللى بتتحكم فى حياتك كلها 
مش قادرة استوعب انك عبارة عن صيدلية متحركة ع الارض 
بتاخد كل انواع الادوية يا حبيبى وانت صغير ف السن 
بتاخدها وانت مش عارف هتاخدها لحد امتى وبتاخدها اصلا ليه 
مش قادرة احط ف بالى انك مش قادر تحلم عشان مش عارف اذا كنت هتحقق حلمك ولا لاء
كل ما احط نفسى مكانك وانا قاعدة بفكر واحلم ببكرة 
وانت قاعد بتحط ف العلبة دوا بكرة  
ساعات كتير ببقى نفسى اخدك ف حضنى واقولك انا اسفة 
نفسى اعرف ابقى حنينة معاك زى ما انت حنين على الكل 
نفسى ابقى زيك وادور عليك زى ما بتدور على بابا ساعة اما يغيب وعلى ماما لما بتكون متضايقة وتيجى تندهلى وتقولى شوفى امك بتعيط 
زى ما بتقف تستنى اخوك وهوجاى من السفر وكل شوية تطلع البلكونة عشان اما يوصل تديله مفتاح البوابة ويطلع بسرعة 
زى ما بتنسى اى اساءة عملناها فيك وبتبقى واقف مخضوض اول ما حد فينا بيتعب 
هو انت كده ازاى 
مستحمل كده ازاى 
انا اسفة اوى انا اسفة عشان مش قادرة اعمل اى حاجة ليك 
مش قادرة اعمل حاجة غير انى ادعيلك ربنا يدخلك الجنة على صبرك للاذى اللى عملناه فيك
عارف انا فخورة بيك دلوقتى 
وهفضل فخورة بقوة احتمالك دى وانك بتحبنا وبتحب ربنا وبتحب الاذان 
انا مبتكسفش اتكلم عنك على فكرة انت ملكش ذنب ف انك تبقى كده يبقى استعر منك ليه بس انا مبحبش حد يعطف عليا بيك 
انت احسن منى اصلا عند ربنا
نفسى اسامحنى على اللى بسببه ليك من حاجات وحشة بتفكر فيها بسببى 
نفسى تخف وتبطل تملا العلبة 
نفسى تحقق حلمك الصغير اوى 
نفسى تاخدنى ف حضنك اه والله بجد نفسى اوى
يارب تخف  
يارب تدخل الجنة وترتاح يا حبيبى يارب

* لاقيتك وانتى بتكتبى ف الاجندة كلام على قد بساطته على قد ما هو مهم بالنسبة لك جدا وكل كلمة كتبتيها وانتى مبسوطة بتفتكرى حالة الانبساط دى بكل ملامحها بتفتكرى حتى المكان والقعدة اللى كنتى قعداها ساعة ما كتبتى

* وانتى واختك اما بتتكلموا كأنكم من سن بعض مع ان الفرق كبير
وبتحكيلها حاجات كتير وبتحكى كل اللى ف نفسك كأنها انتى بالظبط وبتشتكى لها من حاجات عبيطة كتير بس هى بتصبرك وبتقويكى و بتدعيلك دعوات حلوة من قلبها بتحسيها اول ما بتقولها حتى لو قالتها كتابةَ 

*.*
مش انا لاقيتك .
اوعى تضيعى تانى انتى فاهمة
عشان انا تعبت لحد ما لاقيتك
ودفعت بدل الدموع بسطرمة :D
انا قولتلك اهو ...لما اشوف  :وش رافع حاجب:

ايميل قديم

نذهب فى رحلة لنشاهد اجمل مساجد العالم وانرى كيف اندمجت الحضارة الاسلامية العظيمة

مع ثقافات شعوب العالم المختلفة ليتضح هذا الاندماج فى صورة روائع معمارية

                                       مدهشة لن ترو لها مثيلا.تم استثناء الثلاث مساجد المعظمة

المسجد الحرام والمسجد النبوى والمسجد الاقصى

لانها اسمى واعظم من اى مقارنة

لنبدأ رحلتنا من تركيا 

مع مسجد السلطان احمد باسطنبول:يعرف ايضا باسم الجامع الازرق وهو احد الامثلة المذهلة

على روعة العمارة العثمانية وامرببنائه السلطان احمد الاول عام1609واستغرق بناؤه 7سنواتلينتهوا من بنائه فى عام1616قبل وفاة السلطان احمد بعام واحد ومن الجدير بالذكر ان السلطان احمد اراد المبالغة فى تعظيممسجده فامر ببناء

6مآذن شاهقة للمسجد ولكنه قوبل بمعارضة شديدةلان المسجد الحرام حينها كان يحتوى على 6مآذن

فامر السلطان ببناء مئذنة سابعة للمسجد الحرام ليميزه

ومن تركيا الى باكستان من امام مسجد فيصل فى اسلام اباد وهو احد العلامات المميزة


للاسلام اباد واحد اكبر المساجد فى العالم حيث تبلغ مساحته500متر مربع ويمكنه استيعاب 80الف مصلى وتم بناؤه بهذا الشكل الفريد على شكل الخيمة العربية ولهذا فليس له قبة اما عن تاريخ بنائه فقد تم اقتراح بناؤه بعد زيارة الملك فيصل بن العزيز لباكستان فى عام1969فاقيمت مسابقة دولية شارك فيها17 مهندس تصميم فاز بنتيجتها مهندس تركى

ليتم بناء المسجد فى عام1986بتكلفة وصلت ل130مليون ريال سعودى تبرع بها الملك فيصل كامله لهذا سمى المسجد باسمه هو والشارع المؤدى له



ومن باكستان الى الهند (ناهى ناهى)ومسجد جاما او المسجد الجامع

يقع فى مدينة دهلى وهو احد اكبر مساجد آسيا حيث يتسع ل25الف مصلى وقد بناه الامبراطور المغولى شاه جهان الذى بنى تاج محل واستغرق بنائه اعوام وليكتمل عام1656

ومن الهند الى ماليزيا التى سنبقى فيها طويلا(هاتو الاكل معاكم) التى اعدكم انها ستذهلكم بمساجدها الرائعة ولنبدأ بمسجد

بوترا جايا الذى يعرف ايضا بالمسجد الازرق

هذا هو اجمل المساجد فى ماليزيا يقع على بحيرة بوترا جايا الاصطناعية فى مدينة كولا لمبور ويتسع ل15000مصلى

وقد تم الانتهاء من بنائه فى عام 1999

نترك مسجد بوترا جايا لنذهب الى مسجد رائع اخر فى ماليزيا وهو مسجد الكريستال

هذا المسجد مصنوع من الكريستال الخالص يقع فى مدينة كوالاترينجانو(مش مهم تقرؤها) فى الشمال الشرقى من شبه الجزيرة الماليزية وامرببنائه السلطان ميزان زين العابدين فى عام2006 واستغرق بناؤه عامين ليتم افتتاحه فى عام2008
مش ده معلش غلطة مطبعية اللى بعده

ايوة هو ده

ومن مسجد الكريستال لازالنا فى ماليزيا واحد اجمل مساجدها على الاطلاق وهو مسجد زاهر

هو احد اقدم المساجد نسبيا فى ماليزيا حيث تم بناؤه فى عام1912وهو احد العلامات المعمارية المميزة ويصنف على انه

احد اجمل مساجد العالم تم تصميم قبابه الخمس على اساس اركان الاسلام الخمسة وتبلغ مساحته 11.558متر مربع

لم نغادر ماليزيا بعد بل سننتقل من مسجد زاهر الى مسجد مضيق مالاكا

اعجبنى كثيرا هذا المسجد الرائع الذى يبدو كما لو كان لوحة فنية اسطورية وهو مبنى على جزيرة اصطناعية بالقرب من مدينة مالاكا وتم بناؤه فى2006 ولا توجد للاسف اى معلومات اخرى عنه سوى هذه الصور الساحرة

نختتم رحلتنا الطويييييييلة  باجمل مساجد ماليزيا على الاطلاق وهو مسجد كوالا كانجسار

تم بناؤه فى1917 ويقع فى مدينة كوالا كانجسار بولاية بيراك وهذه مجموهة غاية فى الروعة لهذا المسجد

انتهى ...
=====
ايه ده بقى يعنى
ده ايميل قديم اوووى كنت عايزة اعمله بوست هنا ع المدونة من قديم الازل
(ايام ماكنت بانشر ف اليوم 3 بوستات ملهمش اى علاقة ببعض اشاسا :D)
ولاقيته ف مسودة البلوج
وبما انى من هواة "الفُرجة على الصور" فكنت مقللة الكلام الموجود ف البوست وسايبة الصور تتحدث عن نفسها
وجبته من المسودة وشيلت عنه شوية غبار كدهون وحطيته .

حد يسألنى ايه لزمته ؟ واما هو ف المسودة....
ومارضيتش تنشريه زمان جاية تنشريه دلوقتى ليه ؟

هقوله متع عينيك وشوف الاحسان واتفرج وانت ساكت 

بشاير

بشاير الخير وكرم رمضان هلً على ابو الريش 

شوف :-)

الــشيــلــة :) احلى شــيــلة 

بوست عند فاتيما الطماطم  

انقر ها هنا يا جرع  

وفـــرحة داليتـــى :)

بوست عند وش الخيــر 

انقر ها هنا وافرح 

 أبو الريش ..هتعيش يعنى هتعيش

 باذن الله 

^_^                                

أبو الريش خير ومحبة ورسم بسمة :)

 

تخيلها كده ..
وانت بتتبرع.. بتتصدق .. تخيلها كده

ركز فى ابتسامتهم الراضية 

وخليك سبب فى دوامها على وشوشهم

-------

ابو الريش بقى :)

وحط جمبها عشرتاشر تربنتاشر ابتسامة

كل رمضان 

ناس جميلة ، بتروح مكان جميل ، ترسم بسمة جميلة
على وشوش الاطفال الجميلة اللى هناك :)

ميعاد رسم البسمة :-)
اليوم :- السبت يعنى اجازة يعنى مفيش حجة

التاريخ :- 11 اغسطس يعنى اول يوم بعد القبض برده مفيش حجة :D

الساعة :- 4 عصرا وفطارك عندنا واسأل مجرب من رمضان اللى فات

المرة دى هيكون ف كافتيريا اوبرا 

تسألنى حلوة ولاوحشة 

اقولك حدا الله ما اعرف عنها حاجة 

بس انا وثيق من الفوز مع الناس الحلوة دى

المكان :- امام مستشفى ابو الريش اليابانى للاطفال

تمشى شوية بعد محطة مترو السيدة زينب 

هتلاقيهم هناك على طول :) 

-----

بالنسبة للتبرعات 

فداليا وش الخير 

اقترحت انها تكون مادية افضل 

نظرا لان الحالة قحط ع المستشفى 

وناقصهم اجهزة طبية وادوية

 فيبقى احسن انها تكون مادية 

---

ومش فاهمة ازاى لحد دلوقتى 

ولا اعلان عن المستشفى دى 

انا فاكرة رمضان اللى فات او يمكن اللى قبله

شوفت كده خطفة من اعلان عنها بصوت يسرا وكان

الساعة 3 الفجر 

وقومت بعدها ادور ع الاعلان ع اليوتيوب يمكن اعرف انشره ويجى بفايدة

اصلا مالقيتلوش اى اثربعد محاولات بحث 

بكل الاسامى المتعلقة بابو الريش ..

-هو اعلان زى بقية اعلانات استنزاف العواطف  بتاعة المستشفيات التانية

هيتكلف له قد ايه يعنى ؟!
=معتقدش انه كتير

لان المستشفى اصلا مش صرح كبير ولا عظيم ولا مبناه فخم من بره

ولا فيه جنينه قد كده ولا مناظر ولا اى حاجة

للدرجة انه يتصور فيه حاجات كتير 

الحكاية كلها اربع ادوار واستقبال وشكرا 

ويوم ما يطلبوا مساعدة هتبقى اجهزة ناقصة وادوية غالية

ومكان آدمى ينفع اطفال يقعدوا فيه ويحسوا انهم ممكن يعيشوا

بس كده 

يبقى نقووووول تانى
الساعة الرابعة عصرا بتوقيت السيدة زينبُ تكون قدام باب المستشفى
ومعاك ما تيًسر من النقود والدنانيروكده يعنى

واحب افكرك بحاجة مهمة
" ولاتحقرن من المعروف شيئا ولو أن تلقى اخاك بوجه طلق"
المهم تعمل معروف :))
وخيرُ الاعمال ادومها وإن قل
وصنائع المعروف تقى مصارع السوء وكده

وهنيالك يا فاعل الخير والثواب 

زكى عن مالك ونفسك وعيالك

وانشر الايفنت عندك ف مدونتك وفى كل حتة تعرفها

وتلم من الاهل والاقارب والاصدقاء والعم والخالة وكل البنى آدمين اللى تعرفهم 

ملحوظة :-

 تلقى احدهم هذه الرسالة ونشرها ع الفور لجميع من يعرفهم فرُزق بقطايف رمضان وكنافة بالقشطة وبلح باللوز من حيث لا يحتسب وحياته اصبحت عنباً
وتلقى اخر نفس الرسالة فاهملها فحُرم من بلح الشام وظل حبيس الشخاف بالمكسرات طيلة شهر رمضان ولم يذق للبقلاوة طعما وحياته اصبحت بطيخة وببذر كمان

انا قولت اهو
اللهم بلغت اللهم فاشهد 

واللهم انى صائم :D 

----

ناس زكوا عن مدونتاتهم :))

يا أبو الريــش انشــالله تعــــيش "فاتيما " 

"داليا وش الخير"وابو الريش الخير والمحبة 

"نورا مش خيخة " والبنسة لابو الريش 

 أبو الريش ... الفارس الأخير"ابو الازاهير"

 التجمع السنوى الخيرى  ...   "آبى هانم "Appy planet

الظرف ... شيرين سامى :) 

انا فاكرة ابو الريش اول سنة واول لقاء روحته مع المدونين 

فاكرة ان فرحتى بشوفة الناس اللى بحبهم كانت طغت عليا

وماكتبتش عن المستشفى قد ما كتبت عن فرحتى بشوفتهم :(:

-بس فاكرة انى يوم ما روحتها مدخلتش اوض كتيرة وحمدت ربنا انى ما طلعتش قسم المخ والاعصاب عشان ف بنات طلعت ورجعت معيطة
مجرد انى الاقى دماغ طفل متركب فيها خراطيم وحاجات كده يا الله !
اشفى مرضانا ومرضى جميع المسلمين وعافهم واعفو عنهم

-فاكرة الاوض اللى دخلتها كانت عبارة عن سراير كتيرجوه اوضة واحدة كل سرير نايم عليه طفل متعلق ف ايديه الكانيولا وجنبه ع الارض مامته وباباه واخواته فارشين ونايمين

-فاكرة اما حد دخل عليهم بكيس بلالين او الوان وكراسة تقريبا :المهم حاجة بسيطة اوى:

فرقت معاهم جدا وفرقت مع الام بالذات وفاكرة ابتسامة واحدة من الامهات دى

الابتسامة دى لحد دلوقتى مش عارفة افسرها او اوصفها 

-فاكرة ابو الريش اللقاء الثانى والادوية الغالية جدا
اللى كان كل دوا فيهم ب3000 وشوية
فاكرة ان الكل كان بينقل اسامى الادوية ف مدوناته ومنهم اللى كان بيسال عن التركيز بتاع الادوية عشان يجيبها صح 

فاكرة ان الظرف مع داليتى لحد ما طلعنا من الاوضة كان مليان وكل شوية حد يجى متاخر ويسال عنها عشان يديلها فلوس

فاكرة انها قالت ان المبلغ كبير والحمد لله وفينا جزء مش قليل من الادوية المطلوبة 

واللى ثمنها كان غالى ع الاهالى وع المستشفى. الحمد لله :)

السنة الجاية ف رمضان اللى جاى باذن الله ان عشنا
هاكتب تانى ع ابو الريش 

وهاقول فاكرة اما جمعنا تبرعات كتيركتير كتيير بالالوفات كده

وفكينا كرب المستشفى 

وساعدنا اهل طفل مريض 

وطمنا ام على صحة ابنها

وطبطبنا على قلب اب مش قادر يساعد ابنه 

ورسمنا بسمة أمل على وش طفل محتاج لنا :)

ادعو لهم .... لحد ما تروحوا لهم ^_^
"اللهم اشف شفاءا لا يغادر سقما "