الأحد، 26 أغسطس، 2012

لاقيتك .

لاقيتك ........ مش انا لاقيتك !


* لاقيتك فى خروجة صحاب وانتى عاملة فيها مامتهم وبتعديهم الشارع وبتنقى لهم الحاجة الحلوة اللى هياكلوها

* فى حضن حضنتيه لماماتك ساعة ما اتسرقت منها الشنطة 
وحضنتيها جامد وهى بكت اوى ف حضنك وكأنها كان نفسها تبكى فيه من زمان 

* لاقيتك ف هزار مع اخوك بيقلب بتهييس غريب ولذيذ وبتصوريه كمان وانتو مهيسيين 

* لاقيتك ساعة اما بتشاكسى باباكى ف نقاش سياسى او نقاش عن اى حاجة 
اينعم صوتك عالى وبتتنرفزى وبتقاوحى معاه كتير وهو مسميكى ست الواعظة بس بيبقى نقاش حلو وبينفعك وبيديكى خبرة

* لاقيتك وانتى بتموتى فى حاجة اسمها العمل التطوعى وبتشاركى فى اى حاجة فيها خير وانتى بتجاهدى فى نفسك من جوه علشان النية تبقى خالصة لوجه الله مش لحد تانى

* لاقيتك وانتى بتدعى ربنا يارب طمنى انك قبلتنى ورضيت عنى 
يارب ابعتلى اى حاجة تخلينى احس انك بتبص لى وحضرتك مبسوط

* لاقيتك وانت مقتنعة بفكرة بتبقى مقتنعة بيها حتى النخاع وشارباها شرب كده وبتتقنى اوى فى اى حاجة عشان تدعمى الفكرة دى

* لاقيتك وانتى بتحبيهم اوى وبتبصى لهم بابتسامة دافية عمرك ما ابتسمتيها لحد واتعلمتيها فيهم وليهم 
وانتى بتدورى على كل حاجة بيعملوها وتقلديهم وعايزة توصلى لمستواهم ونفسك اوى تبقى شبههم كلهم من كتر ما كلهم حلوين 

* لاقيتك وانتى مسهمة ف محاضرة وفاتحة بوقك من كتر ما انتى مش فاهمة حاجة ولو الدكتور كويس بتصطادى الحكم والعبر اللى بيقولها ف وسط المحاضرة -ساعة اما بيهزق طالب-وتدوينها ف اول ورقة ف كتاب المادة 

* وانتى وشك احمـــر وبتعرقى جدااا وايديكى بترتعش ساعة ما بتيجى تتكلمى مع حد من الجنس الاخر 
 كتير بتبقى طروبش ف الكلام وساعات بتبقى مدب كمان وبطيخة ف الكلام خالص وساعات بيطلع منك حكم (سبحان الله)

* وانتى اول مرة تطلعى على الstage 
بتاع المحاضرات ووقفتى ومسكتى المايك واتكلمتى مع عيال دفعتك عن حملة اوعى ضد المخدرات كنتى بالعة المايك اصلا مع ان صوتك عالى لوحده ويرج اجدعها مدرج ومكانش معاكى ورقة ولا كنتى محضرة اصلا وطقت ف دماغك الفكرة ساعتها واخدتيها تحدى ومغامرة مع صاحبتك اللى قالتلك ماتطلعى هو حد حايشك
واتكلمتى كتير وقولتى كلام كويس واما لاقيتى صوتهم عالى وبيعملوا دوشة 
لفتى نظرهم وسألتيهم عايزنى اكمل ولا انزل وماكملش؟؟ 
ردوا عليكى بعضهم بالصوت والاشارة "كملى كملى"


* وانتى قاعدة جمب اخوك التعبان وبتعيطى وبتبحلقى ف وشه وبتقوليله :- انت ازاى بتستحملنى وانا متعصبة وانت تعبان كده 
ازاى انا قاسية كده عليك ومش قادرة احط نفسى مكانك 
مش قادرة اتخيل ان حباية الدوا دى هى اللى بتتحكم فى حياتك كلها 
مش قادرة استوعب انك عبارة عن صيدلية متحركة ع الارض 
بتاخد كل انواع الادوية يا حبيبى وانت صغير ف السن 
بتاخدها وانت مش عارف هتاخدها لحد امتى وبتاخدها اصلا ليه 
مش قادرة احط ف بالى انك مش قادر تحلم عشان مش عارف اذا كنت هتحقق حلمك ولا لاء
كل ما احط نفسى مكانك وانا قاعدة بفكر واحلم ببكرة 
وانت قاعد بتحط ف العلبة دوا بكرة  
ساعات كتير ببقى نفسى اخدك ف حضنى واقولك انا اسفة 
نفسى اعرف ابقى حنينة معاك زى ما انت حنين على الكل 
نفسى ابقى زيك وادور عليك زى ما بتدور على بابا ساعة اما يغيب وعلى ماما لما بتكون متضايقة وتيجى تندهلى وتقولى شوفى امك بتعيط 
زى ما بتقف تستنى اخوك وهوجاى من السفر وكل شوية تطلع البلكونة عشان اما يوصل تديله مفتاح البوابة ويطلع بسرعة 
زى ما بتنسى اى اساءة عملناها فيك وبتبقى واقف مخضوض اول ما حد فينا بيتعب 
هو انت كده ازاى 
مستحمل كده ازاى 
انا اسفة اوى انا اسفة عشان مش قادرة اعمل اى حاجة ليك 
مش قادرة اعمل حاجة غير انى ادعيلك ربنا يدخلك الجنة على صبرك للاذى اللى عملناه فيك
عارف انا فخورة بيك دلوقتى 
وهفضل فخورة بقوة احتمالك دى وانك بتحبنا وبتحب ربنا وبتحب الاذان 
انا مبتكسفش اتكلم عنك على فكرة انت ملكش ذنب ف انك تبقى كده يبقى استعر منك ليه بس انا مبحبش حد يعطف عليا بيك 
انت احسن منى اصلا عند ربنا
نفسى اسامحنى على اللى بسببه ليك من حاجات وحشة بتفكر فيها بسببى 
نفسى تخف وتبطل تملا العلبة 
نفسى تحقق حلمك الصغير اوى 
نفسى تاخدنى ف حضنك اه والله بجد نفسى اوى
يارب تخف  
يارب تدخل الجنة وترتاح يا حبيبى يارب

* لاقيتك وانتى بتكتبى ف الاجندة كلام على قد بساطته على قد ما هو مهم بالنسبة لك جدا وكل كلمة كتبتيها وانتى مبسوطة بتفتكرى حالة الانبساط دى بكل ملامحها بتفتكرى حتى المكان والقعدة اللى كنتى قعداها ساعة ما كتبتى

* وانتى واختك اما بتتكلموا كأنكم من سن بعض مع ان الفرق كبير
وبتحكيلها حاجات كتير وبتحكى كل اللى ف نفسك كأنها انتى بالظبط وبتشتكى لها من حاجات عبيطة كتير بس هى بتصبرك وبتقويكى و بتدعيلك دعوات حلوة من قلبها بتحسيها اول ما بتقولها حتى لو قالتها كتابةَ 

*.*
مش انا لاقيتك .
اوعى تضيعى تانى انتى فاهمة
عشان انا تعبت لحد ما لاقيتك
ودفعت بدل الدموع بسطرمة :D
انا قولتلك اهو ...لما اشوف  :وش رافع حاجب:

هناك 7 تعليقات:

Baskouta يقول...

:)

حفيدة عرابى يقول...

ربنا يسامحك
ربنا يسامحك على اللى انتى عملتيه فيا لما شفت البوست ده
الف الف مبروك بجدعلى اللقاء الجميل اللى تم ده والله
وكل اللى بتتكلمى عنه موجود فيها حتى وانتى بتظلميها وبتقولى انك مش لاقياها ؛)
انتى حلوة قوى ..شكلا ماشى
وكمان من جوه وده بيبان على فكرة ومن بدرى ومش عارفة هو انتى كنتى مش لاقياها ازاى ...دى واضحة وباينة قوى

عسل لما وشها بيحمر فى الكلام مع الجنس الاخر وواخدة بالى أنا من الارتباك اللى بيحصل أحيانا وبيبهدل الدنيا ده :)
بس برضه زى السكر ...هو فيه أجمل من الحياء !!!

اخوها
انتى عارفة انا ممكن يحصل لى ايه لما اشوف الكلام ده وموافقاكى فيه
بس اتعودت ان الحاجات اللى أنا مش قادرة ابدا على تغييرها ومش فى ايدى أبدا أى سبب يخلينى اقدر عليها بمنتهى الهدوء واليقين اقول يارب اصلح الحال من عندك ...حلها من عندك
أنا خلاص مش عارفة اتصرف ...وربنا كل مرة بيخلينى احس اد ايه انا غلطانة لما بزعل و بتتحل كل حاجة من غير مااحس
لو هو صعبان عليكى عشان مظلوم والدوا والاحلام والصيدلية ومش متهنى بالدنيا زى ماانتى متخيلة ...يبقى افتكرى حاجتين
ان ربنا سبحانه وتعالى العدل ومش بيظلمنا ابدا مهما حسينا بعكس ده
وان تعبه ده فى الدنيا ليه جزاء فوق الخيال بس احنا اللى مش بنصبر
اللى خلق الكون بيدبره :)
بس فيه حاجة تانية وكويس انك اتكلمتى فى الموضوع ده لانى عايزاه مشروع بقى مش حاجة نعملها حسب الظروف
أنا عايزة كلنا نصبر بعض على تصرفاته الغلط وكلنا نتعمد نعاملة معاملة احلى من أى معاملة شافها من غير ماده يبقى مؤثر على التربية والصح والغلط
عايزة اعمل كده وهى بحكم قربها تقدر اكتر منى

سلم لى عليها واحضنيها وبوسيها بدالى وقوليلها انها حلوة قوى وانى كل الرغى ده لانى فرحانة بيها مع ان كل المعلومات دى عندى من زمان
بس الرغى لانى فرحانة ومش عارفة اتكلم

ايوه الرغى لانى مش عارفة اتكلم
هو كده بقى ...عندك اعتراض ؟
فيه حاجة ان شاء الله !!

والسلام عليكم ورحمة الله وبركاته :)

فاتيما يقول...

انا مش فاهمة أى حاجة ...
بس حاسة بكل كلمة
و دخلت قلبى وجعته
وعصرته
وخلتنى أحس ان فيه ملايكة ع الارض
كتيييير حوالينا وساكتين
واحنا ف عز الزحمة والخناق والدوشة
مش حاسين بيهم ولا مقدرين نعمة وجودهم

انا مش عارفة أشرح
بس التدوينة روعة
و ملخبطة لخبطة مترتبة كدا
ومنطقية مع انى مش فاهمة حاجة
بس حبيتها جداااااااااااااااا

العنوان كمان
حلو قوى ... قوى قوى يعنى


وانتى احلى من كل حاجة
:-*

بيطرية ومش بايدى يقول...

بسكوتة
:) :) :)

بيطرية ومش بايدى يقول...

ميس رشا هانم
^_^
تعرفى انا بعد ما كتبت ماكنتش هانشر
عشان ماوجعكيش وانتى بتقرأى
تخيلتك وانتى ع الاب وبتقراى ومكنتش عايزة انشر
بس قولت يلا هابقى اصالحها بطبق بابا غنوج :D
خلاص
بلغتها كل اللى قولتيه وانتى مش عارفة تتكلمى :D
ووصل بالحرف وقالتلى حاضر عٌلم وهينفذ
باذن الله ومن النهاردة
--
بالنسبة بقى للتعليق التانى ؛)
فقولت مش هانشره لاحسن حد من الحريم يكون خالع راسه
ودعيت ف سرى
ربنا يرزقه بام شاكر اللى تعوضه بقى عن البهدلة دى ويرجع تانى يسوق شارع قدامه ويشتكى منه الاسفلت وكده
--
وعليكم السلام ورحمة الله وبركاته
:)

بيطرية ومش بايدى يقول...

فاتيما :)
معلش انى خليتك كده
مكنتش اقصد :)
يمكن اما تقرأى كلام ميس رشا تفهمى بالمنطق شوية
واحب اقولك ان التدوينة اللى انتى حبيتها دى
" من بعض ما عندكم يا جميل "

واصلا اصلا عيونك احلى من اى حاجة ف الدنيا عشان كده بتشوفى كل حاجة جميلة
:*
----
http://www.9ori.com/media/images/03c634cef2.jpg

sony2000 يقول...

:)