الأحد، 23 أغسطس، 2009



شايفين الشجاعة دى شايفين القلب الجامد ده

تفتكروا انا ممكن اعمل زيه كده هاها ده من عاشر

المستحيلات انتو بتكلموا ازاى مش عارفة يمكن اما هاكون

مجبرة ف السكاشن على كده ممكن اعملها وانا مضطرة

ممكن حد يفتكر دلوقتى ان انا بنت فافى كده و(خيخة واى كلام)

احم احم بلاش نجيب ف سيرة الناس بعدين نتضرب

بس بجد اى حد يقولى شرحى بنى ادمين طلعى مخهم ومصارينهم

اى حاجة انا جاهزة مش انا اللى بيغمى عليا ف السكاشن بتاعت البنى ادمين بس

انا مش بقدر امسك اى حيوان ان شاء الله حتى حاجة صغننة زى الكتاكيت مثلا

شكل كده مصيرى بان من اوله لو جبت مقبول يبقى متفوقةمش كده برده ولا انتو رايكم ايه؟؟؟

حد يا جماعة عنده حل ليا ؟ شكلى كده اتطبق عليا المثل اللى بيقول

اللى بيخاف من عفريت بيطلعله وانا طلعلى العفريت بتاعى

من صغرى وكان اخويا يحب يلمس القطط ويطبطب عليها

ويحط الاكل للفراخ وكانت ماماتى تخاصمنى عشان مبرداش اطع

احط لهم الاكل والله باين هى اللى دعت عليا هى وبابا ان انا ادخل الكلية دى

يلا بس هاروح منها فيييييين ورايا ورايا

اغيثونى يا جماعة وشوفولى حل .

هناك 18 تعليقًا:

لقد خلقنا الله احرارا يقول...

بصى يابيطرية
التدوين ده عالم رائع
صعب ان حد يعرفه ويستغنى عنه
والاجمل لما تحسى بتفاعل الناس معاك
لكن ده ياقمر ييجى ازاى
هقولك خلاصة خبرتى على اساس ان انا بيل جيتس يعنى واجرى على الله
الناس تحس بيك وتعرفك ازاى ؟
ده عالم ياماما
بس انت مش عايزة تكونى فيه لوحدك
طيب نعمل ايه؟
ايه الرغى ده هقول اهوه من غير زق

ندخل عند المدونات اللى بتعجبنا ونعلق عندهم
ياريت التعليق يكون فى الجون
مش مجرد كلمتين وخلاص
واكيد انا لما اشوف حد علق فى مدونتى
هضغط على اللنك بتاعه
لو لقيته كاتب كلام لذيذ اكيد هرجعله تانى

بس فى مشكلة
انا ممكن انسى اللى علق عندى
الا لو هو استمر فى التعليق على تدويناتى
اكيد مش هنساه
وشوية شويةهحطه فى قائمة المدونات المفضلة عندى
هى الحكاية وقت وصبر
هى التعليقات مش هتفيدنى فى حاجة
بس كنت بزعل وبحس انى فى الفضاء التخيلى لوحدى
وبفرح جدا خصوصا لما يجيلى تعليق من حد معرفهوش

هنعمل ايه هو الانسان كده حيوان اجتماعى

حطى خطوط كتير تحت حيوان دى
اوعى تبطلى تدوين
علشان خاطرى
اوعى تفهمينى صح
علشان خاطرى كبرى الخط وتقليه شويه
سلام عليكم
ردى عليا لو صاحية

adel يقول...

هههههههههههه
ادي اخرة البنات الفافي
هههههههههه

انا رديت عليكي عندي و خلاص بقيت زبون هنا :):)

e.ayman13 يقول...

ياسلام ياسلام ايه الحلاوة دي ايه الجمال ده
هههههههههههههههههههههه
يلا ياعم هتعملي صداقات وهتحترفي النت وطبعا الحج مش هيسيبك في الليله دي
ربنا معاك وانا من موقعي هذا احيي المعلقين اللي بيفتحو نفسك على التدوين
وربنا معاك
ومن سار على الدرب وصل

بيطرية ومش بايدى يقول...

لقد خلقنا الله احرارا
انا مبسوطة جدا من كلامك بجد شجعتينى انا فكرت زيك كده وقولت ان الايام اللى جاية مش هيبقى ورايا حاجة غير ان انا اعلق ف المدونات التانية عشان الناس تعرفنى ويدخلو البلوجر بتاعى ممكن اعترف لك بحاجة............
لا اما نخش ف الغويط قدام
سلام يا احلى تيمو

بيطرية ومش بايدى يقول...

adel
انا بجد سعيدة سعيدة لابعد الحدود انك جيت وشرفتنى ويارب دايما مدونتك ف ازدهار داااااااااائم ويارب يحبب خلقه فيك كمان وكمان ويخليلك ماما فاتيما
نورتنى يا فندم

بيطرية ومش بايدى يقول...

اما انت بقى يا سى 13
ف اللى عندى ده من بعض ما عندكم ويارب يستجيب دعواتك واعتبر نفسك ف بيتك ويارب يتمم ليك انت كمان بخيييير وتبقى احسن واظرف مدونة حصلت ف عالم البلوجر
كل سنة وانت طيب يا جميل

adel يقول...

هههههههههه
انا عموما رديت عليكي
يا انتيخي
انتي داخلة علي طمع و عشان كده اابقي شوفي الرد عندي مش هاقول هنا حاجة

هههههههههههه

Tarkieb يقول...

كلها سنتين وتحبي الحيوانات وتصعب عليكي وتكتشفي ان مفيش علم ولا علاج في مصر وان الادوية اصلا كانت بشري انتهت صالحيته.وعملوه للحيوانات.ومهما تعملى مفيش حيوان بيخف وكل اللي حتتعلميه حاجات الخمسينات اكل عليه الدهر وشرب..كل الامراض في مصر بس مفيش تشخيص مظبوط..وحتلاقي اساتذة سارقيين كتب وكاتبنها كلها غلطات تودي في داهية وحاطيين اسمهم عليها....ربنا معاكي ....وتخلصي لما تتخرجي ومعاكي تقدير وبرضة ابيض ياورد وتشتغلى وبكرة تفتكريني ويمكن لما تسافري برة حتحبي البيطري اوووي بس حتكتشفي انك مادرستيش بيطري ولكن علوم بيطرية بس
ساعتها حتغيري اسم البلوج بتاعك هههههه

فشكووول يقول...

مش بايدك ليه هوا يعنى عشان خاطر نصف فى المائه ولا واحد فى المائه

على فكره الطب البيطرى اليومين دول مستقبله احسن من الطب البشرى كمان ورب ضاره نافعه

وان شاء الله شويه شويه حتمسكى كل الحيوانات بايديك وكل حاجه وتوصفى لها العلاج او نشوفك ميدكال رب قد الدنيا وعربيه وهيصه

كل سنه وانت طيبه وتحياتى

لقد خلقنا الله احرارا يقول...

مبروك ياستى على التكنولوجيا
اللى ابتدت تزين المدونة
احنا هنعزل شكلنا من البلوجر كده

بيطرية ومش بايدى يقول...

adel
اه ومادخلش ع طمع ليه هو انت شوية ف البلد ده انت الحكومة يا رادل
هو اى نعم هتكون انتيخ كبير شوية بس انا راضية مالكش دعوة وهاروح اشوف اللى انت كتبتهولى ربنا يستر اقابلك هناك موبايلات بقى

بيطرية ومش بايدى يقول...

tarkieb
اولا شرفتنى بالزيارة يا فندم
تانيا المشكلة مش ف حب الحيوانات المشكلة ف مسكهم انا جسمى بيقرعش ساعة اما امسك كتكوت صغنن مابالك بقى ب(جاموسة)ولا بقرة ولا اخوانا الاعزاء السادة الحمير ساعة اما ادى واحد فيهم حقنة معتبرة مش بعيد يرفسنى الرفسة اضيع بعدها
ادعيلى انت بس وربنا يسهل

بيطرية ومش بايدى يقول...

فشكوول
وانت بالف صحة وسلامة وشكرا على الزيارة ويارب يستجيب دعواتك واول ركوبة ان شاء الله ف العربية هتكون معانا اتمنى ذلك
بس على الله ماتكونش عربية كارو
شرفتنى ونورتنى ويارب دايما فشكلتك ف ازدهار

د/ أحمد لاشين يقول...

كله خير يا دكتورة
بكرة تمسكي الفيل ابوزلومة كمان وتحطيه في العلبة
ربنا يكرمك ومفيش افضل من الايام في التعليم والتعود
هتلاقي الموضوع بسيط ان شاء الله
وبعدين ازاي سمحتي لنفسك تكبري كده
وانت متعرفيش تدبحي فرخة ؟؟؟
اكيد كده انت من الشرقية
الشراقوة اصل الكرم
والكرم مينفعش بدون نار

وقديما كانوا يقولون

فلانا كثير الرماد

اي انه كريم

دمتي بخير

لقد خلقنا الله احرارا يقول...

يابيطرية
الشعر اللى على اليمين ده وجعنى اوى
انت تقصدى بيه اللى بالى بالك
ربنا يرحم امواتنا جميعا

بيطرية ومش بايدى يقول...

لقد خلقنا الله احرارا
اه اللى بالى بالك اللهم ارحمهم جميعا
اللهم آآآآآآآآآمين

بيطرية ومش بايدى يقول...

د/احمد لاشين
ثوانى هو حضرتك من الشرقية برده ؟؟؟؟
طيب كمان ثوانى حضرتك من حى السلام؟
طب اخر حاجة بقى لك بنوتة اسمها شوشو
لو حضرتك يبقى المدونة نورت
ولو برده مش حضرتك يبقى يا مرحبا يا مرحبا غطى نورك على الكهربا
وبعدين وانا صغيرة كنت مبرداش يجيبوا الفرخة براسها يعنى لازم يقطعوا راسها الاول ما كنتش اعرف اكل والله مش فافى ولا حاجة بس انا بتعب مع الحاجات الطيور بالذات عارف حضرتك لو خروف ماشى لو بقرة يااااسلام عز الطلب
الحاجات الحجم العائلى دى لكن الباقى ماضمنش نفسى
ربناااااااااااااااااااا يستر

د/ أحمد لاشين يقول...

السلام عليكم
ازيك يا دكتورة
ورمضان كريم
انا من الشرقية فعلا
بس مش حضرتي
وبالتالي انا كده منورتش
صح ؟؟؟
وشوية كده هتقولي خد هدومك وامشي احسنلك صح ؟؟؟
:):):)
واذا كانت المشكلة في راس الفرخة مش مهم
المهم الحاجات التقيلة تكون عادي
بحيث لما نشرف عند حضرتك تعملي لنا اي حاجة ناكلها وانا باحب المندي
آكله وتطرديني بعدها علطول

شرفت بزيارتك
وتشرفت بزيارتك