الثلاثاء، 29 يونيو 2010

طهقان زهقان مضايق





سلام عليكم
مش عارفة ماليش نفس الصراحة اهزر ولا اقول افيهات
مش عارفة زهقانة كده وملانة وقرفانة وجعانة
بس مكسلة اقوم اعمل حاجة
كنت هاجيب اندومى بس الحمد لله بتجيب سرطان فى المخ
وكنت برده هاجيب شكالايتة لاقيت اى حاجة فيها كاكاو
بتقلل نسبة تركيز المخ برده والحمد لله
قولت هاكلم التكتور صاصا
اخويا وصاحبى وكفاءة لاقيته ياعينى عنده امتحان بكرة
ومش اى امتحان ده تشريح
يعنى مكركروم بلدنا يعنى شاشك يامصر
وبنجنى ياجدع
بالله عليكم ياجماعة تدعوله يحسن هو مقلق خالص 
وخايف من المادة دى ادعوله ربنا مايوقعكم فى ضيقة
يلا بقينا نشحت على حسك ياصاصا اى خودعة
فى الاجازة وبالاخص فى ايام الامتحانات 
كان اما يكون جايلى ملل ومش عارفة اذاكر كنت بدوًن برده
بس مش هنا على الموبايل كنت ياقعد افتح الملاحظاتnotes
بالعربى يعنى
واقعد اكتب اينعم كنت باكتب لى جملتين تلاتة بس كنت بارتاح شوية وافتكركم
وتقعد الافكار الجهنمية للبوستات تجيلى
واقول فى الاجازة هاكتب واكتب واحكى بقى 
واخلى كل الناس دى تصدع بقى
بس اصلا مش لاقية حد من اللى كانوا بيجولى هنا
اللى ساب التدوين واللى قفل المدونة من اصله واللى بقاله اكتر من شهرين معبرش المدونة بتاعته 
انا مستنياهم بقول يمكن عشان لسه فى اول ايام الاجازة ومحدش لسه اخد نفسه
لسه فى ناس مشغولة
يمكن الاقيهم فى رمضان 
كان زمان اول ماكنت اكتب اى بوست اقعد استنى التعليقات
وكنت بصراحة باستنى يبقوا كتير 
لكن دلوقتى مش عارفة عايزة اكتب وخلاص 
مش لازم حد يقرا ولا حد يعلق المهم انى باكتب وخلاص
اما المدونين الموجودين 
فلا شك اصلا انهم مبدعين وحاجة كده جامدة اخر حاجة اخر تلات حاجات كمان
من اول ماما فاتيما وحفيدة عرابى ووخيخة اللى مش اى كلام خالص
ود/ستيتة اللى يمكن اصلا متعرفنيش بس بوستاتها فى الجون
وطبعا جيجى والعالم وناس كتير جدا اللى انا قولتهم دول
على سبيل المثال وليس الحصر
وف مدونات كتييييييرة اوى دخلت على البلوجر  وانا لسه معرفتهاش
بس من الواضح انهم داخلين لهدف معين الجمال اللى فى بوستاتهم
مش من فراغ 
قبل الدراسة وانقطاعى بشكل كلى عن المدونة 
كنت شايفة ان اى حد بيعمل مدونة اهو بيخش يتسلى يشوف ناس 
جديدة وفى منهم اللى كان فاكر ان المدونات زى الشات كده يكلموا بنات وخلاص
او العكس 
بس دلوقتى الفرق شاسع شتان مابين دلوقتى وقبل كده
انا ابتديت احس انى جنب دول  صفر على الشمين
هيييييييييه
والله مانا عارفة انا بقيت اخرف ولا ايه
ولا يمكن عشان النتيجة اخر الاسبوع ده
التهييس اشتغل من دلوقتى
عادى جدا تهييس دلوقتى وعياط ونكد بعدين
ربنا يستر
الحاجة الوحيدة او الخبر الوحيد الحلو فى ام اليلة الغم اللى احنا فيها
دى وطشت الدراما اللى وقعنا فيه ده
ان دموع القمر اللى غير اسم مدونتها فى الاخر وخليته
همسات على ضوء القمر
محدش يمكن يفتكرها غير المدونين القدام بتوعنا
من اول عادل البلد دى فيها حكومة
وشاب فقرى
ورانيا ليس فقيرا من يحب
وايناس ملاك من كوكب اخر
ريمان ملائكية
ود/احمد لاشين اللى غايب عننا بقاله زمن
وغيرهم كتير
انا قولت عليهم قدام عشان دول اول ناس شوفتها فى البلوجر ده
وكان جروب هايل
المهم نرجع لمرجوعنا
ده كله عشان نعرف الست دموع ماشى ياتوتو
المهم بقى توتو دى الحمد لله انكتب كتابها
وهاتتجوز قريب ان شاء الله
عقبال عندكم
بس ده كل اللى عندى دلوقتى
لو جت حاجة فى بالى تانى اكيد هااجى وارغى معاكم
ربنا يجيب العواقب سليمة
وماتنسوش بقى تدعوا للتكتور صاصا امانة عليكم
يلا تصبحون على خيييييييييير

هناك 26 تعليقًا:

قلم رصاص يقول...

عليكم السلام

يابووووووووووووووي كل دا رغي
لالالالالالا واضح ان دا فعلا من التكتكه من انتظار النتيجه هههههههههههه

ربنا يستر ويتنجحي وبتفوق كمان
اي خدمه

وربنا يوفق التكتور صاصا وينجحه قادر ياكريم

هاه لسه مطلوب حاجة تانيه

يلا وانتي من اهله

sony2000 يقول...

بجد وحشتي كل الناس دي
الله يولع فيها الامتحانات
بس الحمد لله خلصت من ام التعليم المصري كلووووووووووووووووووووووووووووو
هييييييييييييييييييييييييييييييييييييييه
هييييييييييييييييييييه
ههههههههههههههههههههههه
ومستنظرا النتيجه وربنا يوووووووستور:)

رفيدة يقول...

ايه يبنتي انتي كنتي متعشية راديو ولا ايه .... والف مبروك الاجااااازة ... يلا ياستي يحقلك الرغي كله ... وعقبال لما نباركلك ع النتيجة ان شاء الله واهم مادة حروق الانسان لازم تقوليلي عملتي ايه فيها :)))) دي الاساس بتاع البيطري :))))))))

وربنا يوفقك اخوكي .. ربنا معاه ان شاء الله .. ده تشريح يعني احلي مادة ف بيطري واعتقد ف بشري بردو .. :)) لسه الجامد جاي ...

أحمد زاهر يقول...

اكتر من كده صداع يبقى حرام عليكى
مبروك على الأجازة وعقبال النتيجة
هتدبحى ايه ؟

ربنا معاكى

شفـقــة و إحســــان يقول...

ربنا ينجحك يارب يمكن حالة الزهق دى من انتظار النتيجة بس ما تخافيش اللى تخاف منه ما يجيش احسن منه
تحياتى ليكى

بيطرية ومش بايدى يقول...

قلم رصاص
شوفت كل الرغى ده عندى احساس عالى من التكتة اللا نهائية
يارب يسمع منك
هنعدلك الجمايل

لا شكرا

بيطرية ومش بايدى يقول...

sony2000
والله وانتم كمان وحشتوونى بشكل غير عادى
الله يولع فيها كمان وكمان
ربنا يسترها علينا
وعلى الجميع

بيطرية ومش بايدى يقول...

رفيدة
شوفتى متعشية راديو بالسلطة الحارة
انتم محسسنى انى كتبت معلقة
ماعلينا خلاص ان شاء الله المرة اللى جاية هاقسمه على كذا بوست
الله يبارك فيكى ياجميل ويارب يسمع منك
اه طبعا حقوق الانسان ده دى اهم مادة بالفعل تصدقى بالله والله اكتر مادة ذاكرتها اصل الاذكيا عاملين قدامها 3ايام شوفتى الهنا
التلات ايام دول ماكنوش قدام التشريح
انا معاكى ان التشريح احلى مادة بس مش فى بيطرى الصراحة
فى بشرى ماشى تعرفى ايه اللى جواكى تعملى لنفسك اشعة وانتى قاعدة
لكن ان يكون قدامك جثة حمار متوافرة فى كل الاوقات صعبة

ويارب ينجح اخويا ويوفقه يارب يااوختشى ادعيله بالله عشان انا مش مطمنة خالص

نورتينى ياجميل و
ومستنين باقى حلقات عجلاوى افندى بفارغ الصبر

بيطرية ومش بايدى يقول...

حتى انت ياابن الخطاب
ماشى ماشى
خلاص يبقى المرة اللى جاية هاجيب كيتوفان معايا او باندول
انا احتمال هادبح فرخة ضغنتتة واهم حاجة تكون بلدى يعنى اصلى
الله يخليك
نورتنى يافندم

بيطرية ومش بايدى يقول...

شفقة واحسان
تفتكرى ان اللى تخاف منه مايجيش احسن منه
ولا اللى بيخاف من عفريت بيطلعله
ربنا يسترها
بجد نورتنى وشرفتنى

ليس فقيرا من يحب يقول...

انا اسمة مكتوب هيييييييييييييييييييييه

هههههههههههههههههههههههههههه

كل ده

سلامتك يا عسليه من الزهق والطهقان

والضيقه انشالله اللى يكرهك بس هو اللى يزهق

ههههههههههههههه وحشااااااااااااااانى اوى اوى اوى

ياحبيبتى بجد

ربنا ينجحك وينجح صاصا وينجح كل

الناس

انا بس عندى حاله ملل وكسل كده

نفسى انا كمان ارغىىىىىى معااااااااااكى ومع كل حبايبنا

كتيييييييير اووووووووووووووووى

ونفسى نرجع عن الملل ده ونرجع نشهيص المدونات من تانى

ههههههههههههههههههههههه

امووووووووووووووووواااااااااااااااه

كبييييييييييييييييييييرة وحضن كبيييييييييييير اوى

حلم بيعافر يقول...

انا زهقان برضه
واتضح ان الزهقان والااحساس بالتعب والهدة ده من الحررررررررررر

انا اسمى مش مكتوب ودى فى حد ذاتها جريمة لاتسقط بالتقادم وهاخد كوبى للتدوينة دى كدليل ادانة تاريخى ليكى ولكلية الطب البيطرى ولمادة التشريح

وعادى متحبطيش من قلة التعليقات وخدينى مثل اعلى ...بكتب لنفسى وبقرى اللى نفسى كتبه وساعات مبيعجبنيش

Qatarat Nada يقول...

احم احم ..
معلقة ؟؟؟؟
قال وانا اللى بيقولوا عليا رغاية .. ييجوا يشوفوا :P
ههههههههههههههههههه
بهزر طبعا يا قمر لا ياجماعة حرام ما اتكلمتش كتير اوى يعني
انتى ترغي براحتك يا جميل وانا اقرالك من هنا للصبح يا سلام
ربنا ياختى يكون في عون اخوكى صاصا وفي عونك لما تجيبي النتيجة
اتمنالك التوفيق يا قمر
ومعلش اذا كنا متغيبين عن مدوناتنا معلش ظروف
بس انا واحدة من اللى كانوا متغيبين ورجعت اهه وكتبت كمان بوستين جداد ^_^
متابعاكى من جديد بعد الغيبة ..
انا غيرت اسم بروفايلي .. انا جنة الله

همسات وبحــ الحياه ــر يقول...

هو المفروض انى ادخل ازغرط ولا اييييييه
يخرب شيطانك
هو حد يكون طهقان وزهقان وتضايق
وهو بيكلم حبيبه قلبه :):)

بيطرية ومش بايدى يقول...

ليس فقيرا من يحب
شوفتى يامعلم اى خودعةواحنا نقدر ننسى البيج بوص
يارب يسمع منك ياوختشى وينجحنا كلنا
البوسة والحضونات وصلت وفعصتنى كمان
نورتى ياقمراية

بيطرية ومش بايدى يقول...

حلم بيعافر
ياباشاالكبير كبير
وبعدين عفارك مالى علينا الدنيا
والله قولت انه على سبيل المثال لا الحصر
معلش امسحها فيا المرة دى

ويافندم انت كده كده متاخد مثل اعلى من غير اى حاجة

نورتنى

بيطرية ومش بايدى يقول...

قطرات نودى
بقولك ايه ياببونيتى احنا نعمل وقفة احتكاكية ونحتك على اتهامتهم دى
ربنا يسمع منك ياجميل ويوفقه
وان شاء الله نرجع نظبط كلنا مدوناتنا من تانى
جارى المتابعة ياقمر

ششرفتى ونورتى المدونة وبسطى صاحبتها

بيطرية ومش بايدى يقول...

دموع القمر
اهئ اهئ
انا مش عارفة اعيط انا ولا ازغرط
ده انا شوية وهاطير من الفرحة
حمد الله على سلامتك ياقمر
عودة حميدة
حبيبة قلبى رجعتلى تانى
يارب ابدا ابدا ماتفرقنا ايام
:)))
نورتى ياقمراية وفرحتينى بجد

بنك دم المدونيين يقول...

السلام عليكم
ياريت حضرتك تزورى المدونه وهتلاقى اجابات لمعظم تساؤلاتك
بالنسبه للزقازيق بنبحث ليها عن مشرفيين علشان نعمل تبرع من اولاد المحافظه نفسهم ويبقى دورى وثابت
تعتقدى تقدرى تساعدينا؟

شوكولاتة يقول...

يااااااااااااااة وحشتني مدونتك وبوستاتك مجيتش هنا من زمان اوي بس خلاص فضيتلك وفعلا الفترة اللي فاتت دي كانت فترة انشغال عند الجميع فكله كان سايب مدوناته ومش معبرها بس خلاص متهيألي ان الصيف هيخلي كل واحد يروح على الشاليه بتاعه قصدي على البلوج بتاعه ويصيف فيه براحته

بس ايه حكاية الشوكولاتة وعدم التركيز دي علشان كده انا بقيت مهيسة اخر حاجة


ياللا فوتك بعافية بقى

بيطرية ومش بايدى يقول...

بنك دم المدونين
تم بالفعل يافندم
وان شاء الله البوست اللى جاى عن الموضوع ده
نورت يافندم

بيطرية ومش بايدى يقول...

شكولاتة حبيبتى
وحشانى والله ياجميل والمدونة بجد مفتقداك ومفتقدة لكل الشكولاتات المسكرة
بس للاسف فعلا الكلام ده صحيح
فى دكتور بيجى على العيادة على الحياة قال ان الشكولاتة واى حاجة فيها كاكاو بتقلل التركيز وتعتبر مواد منبهة شوفتى يااوختشى
كل حاجة احنا بنحبها بتطله اااوووت
وانت بعاية ياجميييييييل

دموع القمر يقول...

فينك يادكتورة
اخبار النتيجة ايييييييه

وبعدين فين تعليقك
قولت هلاقيكى اول تعليق

د/ أحمد لاشين يقول...

ربنا يكرمك
ومعذرة عالتقصير
وياريت تطمنينا عالنتيجة

غير معرف يقول...

السلام عليكم
حبيبة قلبي
الي انا زعلانه منها
وهي وحشاني مووووووووت
بطريقه فوق الخيال
وكان نفسي اكلمها من زمان
بس للاسف الشريحه الي عليها رقمها ضاعت
والايميل الحمد لله باسورده ضاع مع الذكريات
والله وحشاني موت موت موت
وربنا معااااااكي يارب يا جميل
ومع الدكتور صاصا الي انا مش عارفاه
انا عاوزه اكلمك ضرووووووري
هكتبلك الايميل بتاعي اهه لتاني مره
nor_aleslam71@yahoo.com
هستناكي تبعتيلي اضافه
في حفظ الله يا قمر
بحبك في الله
السلام عليكم

علاء المصرى يقول...

دعوة للتواصل

تحياتى