الثلاثاء، 24 مايو 2011

اعمل الخير وارمى الموبايل فى البحر



ماهو انا اما اقول ان انا ماباحبش يوم الثلاثاء ده وان اليوم ده اتحط غلط فى ايام الاسبوع
يبقى فى حاجة غلط 
على مدار كام سنة وقلما يعدى يوم ثلاثاء من غير مصيبة امتحان ماجاوبش فيه حد اتخانق معاه حد يتعب ومااعرفش اتصرف حاجة كده ماعليـــنـــا 
المهم النهاردة ايه بقى فى ايام ربنا  الثلاثاء برده سبحان الله  
وكان فى ايه النهاردة 
ايووووون امتحان تشريح عملى المهم انا عمالة اقنع فى نفسى من امبارح إن ان شاء الله مفيش حاجة هتحصل وركزى يابت وربنا هيكرمك وكده يعنى 
وقد كان ربنا كرمنى فعلا بعقلى الجميــــل الرزين العسسسسسسسل
شوف معايا
اما يبقى معروف ان ماينفعش تدخل الامتحان بالموبايل حتى لو انت قافله
وانت امتحانك فيه شرايح ميكرسكوب وانت مصورها ع الموبايل وعايزتراجعها 
فتقول خلاص انا هاخلى الموبايل معايا هاخلص واقفله واهو فى الشنطة مرمى فى الخرابة مع الادوات (بتاعة  التشريح ولا مؤاخذة يعنى) والكتب  وكده يعنى
المشكلة مش فى انك خبيت الموبايل او انك مااديتوش للتكتور المبجل _خالد زكريا
 
المشكلة فى اللى لسه جاى
خلاص الامتحان خلص والحول برده خلص والاجابات الله اعلم بيها 
وخلاص قاعدين مستنين الفرج اما باب المشرحة يتفتح ونخرج ونروح
تلاقى وانت خارج واحد زميلك  ف الدفعة عمال بيعيط قدام الدكتور ويتحايل عليه وهو رافض تماما انه يوافق على ايه معرفش
بس انا قدامى  حالة صوعبت عليا -كالعادة المهببة-بس انا مفيش فى ايديا حاجة اعملها ولا عارفة الموضوع ايه اصلا 
وخلاص هاطلع بقى وربنا يتولاه 
بس خلاص بالتفت وخارجة انا وصاحبتى لاقيت الدكتور بيسالنا واحنا ماشيين حد معاه موبايل ؟؟؟
صاحبتى بصيت لى وردت ع الدكتور وقالتله لاء
بس على مين يعنى ينفع اكدب
انا كنت باشوف الساعة وطلعت الموبايل ومعايا فى ايدى الموبايل
فبعقلى الامور اللى قولت عليه تصرفت وبكل تلقائية وقولت ايوة يادكتور انا معايا اتفضل وفعلا اتفضل واخده واخد اسمى ورقم جلوسى  وانا طبعا مارضيتش اديله العنوان لانى مرتبطة
طبعا انا راحة باديله الموبايل على اساس ان الواد اللى واقف ده حاصله له مشكلة والدكتور هيتصل بحد يحلها له او هيتصرف بشكل او باخر والموضوع يخلص
 وخلص بعد سويعات 
وهو واخده منى على اساس انى باغش منه 
وخد بالك  باغش من الموبايل وراحة اديهوله
المهم
بعد كلام طويل عريض من الدكتور اللى بيقنعنى انى غلط وانه لو عملى دلوقتى محضر غش واثبات حالة -كان ناقص يقولى فيش وتشبيه-هيبقى كده مش ظالمنى وان تصرفى غلط فى غلط ولولا ان انا زى بنته ماكانش زمانه سابنى
نهايته
نطلع من الكلام ده بايه-على راى خيخة - ان سياتك ماينفعش تساعد حد ولا تفكر اصلا انك تساعده وخلى ودنك من طين والتانية من طين برده واعمل نفسك ميت 
بدل مايبقى كله ضرب ضرب


معرفش انا باكتب ليه اصلا وانا بقالى مدة طووووويلة ماجيتش
بس اللى اعرفه انى كنت متوترة جدا وعايزة اطلع التوتر ده فى حاجة ملقتش غير احسن من تكتكة الكيبورد اللى ريحتنى
 
خايفة اقول محدش يعمل باللى فى الصورة ده
اتفهم غلط بس انا عن نفسى هابطل احشر نفسى واعمل فيها فاعلة خير 
وكل عام وانتم بخير
 

هناك 5 تعليقات:

حفيدة عرابى يقول...

أهلا بيكى فى الدنيا ياعزيزتى
شوفى حضرتك
انت تعملى الخير وتدعى ربنا يصبرك عليه
أصل عمل الخير يابنتى هو اللى محتاج الدعاء بالصبر والثبات
وحتى لو خدنى على دماغك ثقى تماما ان حقك راجع لك
ربنا موجود ياماما
وبعد ماتنسى الخير اللى عملتيه والمقلب اللى اخدتيه من وراه
هتلاقى ربنا بعتهولك فى موقف أشد بكتير من اللى فاتك

بيطرية ومش بايدى يقول...

ابلة رشا
حفيدة انما ايه اصيلة:)
اهلا بيكى يااوختشى
انتى عارفة اللى مصبرنى على الدنيا دى
ان فيها شوية شخوص كده انا بحبهم
؛)
عارفة المشكلة فى ايه المشكلة فى حتة
وخُلق الانسان عجولا
فى حتة الحق دى انا معنديش صبر
وباستعجل على حقى ده اوى
وخصوصا اما يكون اللى قدامى مصمم على انى ارتكبت جريمة ولازم يحملنى غلط مش بتاعى
ماعلينا
بس هو فعلا زى ماقولتى كده
وانا واثقة ان ربنا هو العدل والحق
وهيرجع عاجلا ام اجلا


منورة يارشة هانم

ليس فقيرا من يحب يقول...

هههههههههههههههههههه هههههههههههههههههههههههههههههههههههههههه

احبك لما تنشطى كده ايام الاومتحونات

يا فاااااااااااااااااااشله نايمه طول السنه يعنى
حبكت تيجى تنزلى بوست على الامتحان ههههههه هههههههههههههههههه ههههه

باحبك كده وانتى قلبك حنين يا ستى روقى ياما شوفنا يا اوختى فى الانطحانات

بس ربك هو اللى بيستر

ويا جميل اعمل الخير وتعاون مع الناس بس ركز شويه وبلاش تبقى اهبل كده

مع انى باحبك وانت اهبل وبردو وانت حنين

وحشتيييييييييييينى يا موزتى
ربنا يقويكى وركزى شويه فى المزاكرة

sony2000 يقول...

ربنامعاكي يارب
وسبيها علي ربنا

اللي تقدري عليه اعمليه


وسبيب الباقي علي مابيغفل ولا بينام

ربنا معاكي يارب ياام قلب طيب:)

فاتيما يقول...