الجدول نِزل
وانا مش متقبلة فكرة "الدراسة جاية"
عشان مش متقبلة ان دى أجازة أصلاً :/
نبتديها بالنتيجة اللظيظة
ثُم بتدريب فى الكلية ،، وامتحان ع التدريب
وفى النص مظاهرات
ومن بعده 30/6 المشئوم
ثُم رمضان اللى ماكنش رمضان
ثُم رابعة
ثُم الفض
ثُم الدم
مع ظهور جنس جديد من بنى حيوان ،، متقولب
فى صورة إنسان !!.
انا كبيطرية عجزت عن وصفه حقاً !
المشكلة فين بقى ؟!
المشكلة ان الكائنات دى عندى منها فى الكلية أكوام أكوام أكوام
طب وعلى الفيس بوك .. وعاملة لهم hide وقولت لهم قبلها يحذفونى
انما على الحقيقة بقى هاعمل لهم hide ولا block ازاى ؟
مش قادرة استوعب بصراحة .. اتعامل معاهم عادى
بعد ما شمِتوا فى الدم ، وحللوه ، وقالك دى ثورة ، واتريقوا
على البشر وهما بيتقبض عليهم وبيوتهم وأعراضهم بتُنتهك
كمية التشفّى .. رهيبة !!
مش قادرة اتخيّل ان شهر شعبان
يجي وعند ليلة 15 اقول لربنا يارب سامحتهم كلهم !
اذا كنت انا قاعدة من دلوقتى .. باجهز لربنا دعوات انتقام اصلاً !
لا مش هاسامحهم ،، مش هاسامحهم على كل الدم اللى شاركوا فيه ولا قهرة قلوبنا -واحنا مالناش حد مات- ما بالك اللى ميت له اكتر من واحد !
مش هاسامحهم على كل حلم كان جواه دم !
مش هاسامحهم على تعجيزنا دلوقتى واحنا واقفين لوحدنا ضد العسكر
وهما ولا على بالهم اى حاجة
ولا فى دماغهم دستور بيتلّف ولا سيناويين بيتقتلوا من جيش ...
محتارين نسميه ايه بالظبط ؟ جيش "كامب ديفيد" ولاّ جيش "نوال" ولاّ جيش "مروى"
انا بقيت بكرههم كلهم ،، ومابقوش يفرقوا عندى اى حاجة
مش هاسامحهم على قلوبنا اللى بقيت مليانة غِلّ وكُره وانتقام
بسببهم .
مش هاسامحهم ويوم القيامة كل واحد ليه حاجة هيأخدها !
ما هو أصلاً عَـدل .
صبرنى يارب على السنة دى وابعدهم عنى
هناك تعليق واحد:
اااااااااااااه يابنتى الوضع اللى احنا فية وضع متخلف بجد يعنى على الفيس عاملة للناس اللى ضدك فى الراى بلوك عشان دمك مش يتحرق فى الحقيقة هتعملى اية الله يعينك ياحبيبتى
بس ماتدخليش فى اى حوار سياسى وريحى دماغك
لان كل واحد فاكر نفسة هوة اللى صح اى كان هوة توجه اية
المشكلة بردة احنا ماعندناش احترام للطرف الاخر او حتى تفهم فكرتة حتى لو مش انا قبللاها
إرسال تعليق