كفارة لما بينهما :-)

 أبي هريرة أن رسول الله صلى الله عليه وسلم قال الصلاة الخمس والجمعة إلى الجمعة ورمضان الى رمضان كفارة لما بينهن ما لم تغش الكبائر
صدق رسول الله صلى الله عليه وسلم
-----
اهو انا تقريبا هاكفًر عن ذنوب المدونة كل رمضان :D
مادخلتش هنا من 11 شهر بالظبط
كل شهر رمضان باجاى اكتب كلمتين واهرررب
بس وماله مايضرش
ادينا هنكتب وهننشر وهنقول
وكله بما لا يخالف شرع الله :D
وربنا ييسرها
----
باقلب فى الاجندة بتاعتى لاقيتنى كاتبة
"ضيفى العزيز : رمضان
اتفضل وانا ان شاء الله هاكرمك "
كانت محاولة منى انى استعد لشهر رمضان
واهيأ نفسويتى وروحانياتى وكده
عشان اغتنم كل دقيقة ف رمضان
ده اوكازيون يا جدع كل حاجة معمول فيها تخفيض
وكل ما تشترى تكسب
تجارة كسبانة كسبانة يعنى
----
رمضان بقى المرة دى هيبقى مختلف
هيبقى اول رمضان بعد العمرة :)
هيبقى اول رمضان على بياض
ادعى فيه ربنا بكل باقى الامنيات اللى عايزاها
وانا متاكدة انه هيحققها
"زى ما حقق لى امنية انى اطلع عمرة مع عيلتى قبل رمضان 2012 "
يعنى خلاص
حتة الشك ان ربنا ممكن ما يستجيبش ليا دعوة
"وده لظن منى انى مقصرة معاه فمش هيجيب لى "
خلاص انتهت
مابقتش افكر فيها تانى
ما انا خلاص جربت انى ادعى وانا متيقنة من الاجابة
متيقنة انه كاتب لى الخير اينما كان
متيقنة انه كريم ورحيم وغفور و ودود
متيقنة انه بيساعدنى عشان اعمل اى حاجة تقربنى منه
اصل انه يستجيب دعوتى ويرزقنى زيارة بيته
وييسر لى كل حاجة عشان ادعيه !
يعنى كأنه بيقولى انا عامل لك كل حاجة اهو عشان تدعينى
وعشان انا استجيب لك.. ملكيش حِجة بقى
يارب انا بحـب حضرتك جــدا .
----
اللهم سلمنا رمضان
وسلمنا الى رمضان
وتسلمه منا متقبلا
<3 

22/7.......

بسم الله الرحمن الرحيم

وبه نستعين

وعليه توكلنا وهو رب العرش العظيم 

....

انه فى يوم الجمعة 

الموافق 22/7/2011

قد اتممت عامى الثالث 

الا الثٌلث تقريبا 

لالالاء

انا مش نافعة بالفصحى خالص

شكل الكتب اللى بالانجليزى لوحت لسانى على الاخر

المـــهــم

زى النهاردة كده 

بس سنة 2008 والساعة تقريبا 11الظهر

او قبل الغذاء يعنى بساعات بسيطة

كنت قاعدة على لاب توب 

واحدة بنت حلال كده  

وبنفتتح انا وهى المدونة دى 

كنت حابة الفكرة 

وقولت نجرب 

واخيرا هاخد حريتى وهاكتب هنا

فى الاجندة النتية دى 

من غير مااكون خايفة حد يشوف كلامى ده 

ويكلمنى عنه بعد كده بقى بتريقة والكلام ده

من غير مااكون مقيدة بشروط وكده  

والحمد لله 

عملنا التجارب وباءت بالفشل 

والمعمل انفجر كالعادة 

وعشش فيه الخفافيش على رأى ازهرى 

بس يمكن فى حاجات 

فى بيطرية الجوانية 

اتغيرت (بشاهدة بعض الشهود )

وفى حاجات خايفة عليها تتغير 

وعمالة باتبت فيها بايديا

وسنانى (مع انها وجعانى):(

بس فى حاجة غريبة جدا

كانت بتحصلى كتيير 

ليه يبقى الموضوع فى بالى

وكلام كتير وببقى عاملة حسابى

انى هارغى واكتب بوست قـــد كـــده

واللى عايز يقرا يقرأ واللى مش عايز 

يبقى عمل طيب

اصل شاب فقرى قال انا باكتب لنفسى

 مش عشان حد 

بس اول ما افتح الجهاز واقرب على الكيبورد

الاقى الحاجات بتروح بتروح خالص

يمكن جربت طريقة انى اكتبهم فى ورق الاول

والحكاية دى نجحت فى 3 بوستات بس 

لسه ما نشرتهمش هنا 

لانى كنت كاتبهم ايام الامتحانات 

والباقى برده باءت بالفشل

انا بيتهيالى 

لو كانت المواضيع دى مارحتش من مخى 

كان زمان المدونة دى مكتوب فيها 

يجى تلتمية 300بوست ع الاقل

كنت بادور على المنشورات بتاعتى

هيييه نهايته

انا كنت جاية اصلا ليه ؟؟

اه افتكرت 

 كنت جاية اسجل تاريخ

كنت جاية اقول بس

خلى فاكرة يا بيطرية ناس علموكى حاجات كتير

خلى فاكرة ان الناس دول 

مجرد ذكر اسمهم بس او حاجة تخصهم بيفرحك اوى 

وبيخلكى تحبى حاجة انتى عملتيها بالصٌدفة 

كنت جاية اقول كمان

انك مسيرك فى يوم انتى كمان 

تكتبى حاجة الناس تقرأها وتستفيد 

او حتى تستمتع 

والله يا بت يجى منك 

اصلهم بيقعدوا يقطموا فيكى انا عارفة

ويقعدوا يشاوروا عليكى من بعيد كده

ويقولوا البت بتاعة النت اهى 

عارفة ان فى منهم شخصيات امهم بتبعدهم عنك 

عشان خايفة على بناتها منك 0قال يعنى البت مقطعة السمكة وذيلها0

عارفة ان فى ناس يمكن بتكرهك اصلا بسبب الموضوع ده

وعشان هما عارفين انك بتتاثرى بالكلام

وبتهمتى باراء الناس فيكى عشان تصلحى من نفسك

هما بيقولوا كده 

بس يا بت خلاص

الكلام ده بقى عادى بالنسبة لك 

صح!!! انتى جتتك نحست 

بقيتى عارفة ايه الصح وايه الغلط 

وبقيتى عارفة ايه اللى يرضى ضميرك وربنا طبعا 

يابت ده انتى كمان بقيتى بتاخدى بالك 

من كلام صحابك وبتستشفى منهم اللى فى قلبهم من ناحيتك

شوفتى ازاى يعنى يجى منك 

لسه باهت عليكى اصلك انك غلبانة حبتين 

بس مسير البهتان ده يروح واوكسى البركة فيه

كنت جاية اقول كمان

لمدونتى دى تصدقى جه على بالى كتير 

اقفلك بدل ما انا عمالة اعاقبك كده

بس الصراحة مهونتيش عليا 

مش عارفة ليه 

يمكن عشان متاكدة انى لازم هافتحك تانى فقولت لازمتها ايه 

الشغلانات دى وخليكى وكده كده محدش شايفك 

يمكن..مش عارفة

بس اللى اعرفه ان النهاردة الجمعة والنهاردة عيد 

وعيد ميلادك برده 

فقولت بلاش ازعلك 

والله وحشتينى اوووى ونفسى احكيلك اووى 

بس انتى عارفة فميش حاجة بتكمل 

والنت قرب يفصل 

يلا كل سنة وانتى طيبة بقى

سلام 

اعمل الخير وارمى الموبايل فى البحر

ماهو انا اما اقول ان انا ماباحبش يوم الثلاثاء ده وان اليوم ده اتحط غلط فى ايام الاسبوع
يبقى فى حاجة غلط 
على مدار كام سنة وقلما يعدى يوم ثلاثاء من غير مصيبة امتحان ماجاوبش فيه حد اتخانق معاه حد يتعب ومااعرفش اتصرف حاجة كده ماعليـــنـــا 
المهم النهاردة ايه بقى فى ايام ربنا  الثلاثاء برده سبحان الله  
وكان فى ايه النهاردة 
ايووووون امتحان تشريح عملى المهم انا عمالة اقنع فى نفسى من امبارح إن ان شاء الله مفيش حاجة هتحصل وركزى يابت وربنا هيكرمك وكده يعنى 
وقد كان ربنا كرمنى فعلا بعقلى الجميــــل الرزين العسسسسسسسل
شوف معايا
اما يبقى معروف ان ماينفعش تدخل الامتحان بالموبايل حتى لو انت قافله
وانت امتحانك فيه شرايح ميكرسكوب وانت مصورها ع الموبايل وعايزتراجعها 
فتقول خلاص انا هاخلى الموبايل معايا هاخلص واقفله واهو فى الشنطة مرمى فى الخرابة مع الادوات (بتاعة  التشريح ولا مؤاخذة يعنى) والكتب  وكده يعنى
المشكلة مش فى انك خبيت الموبايل او انك مااديتوش للتكتور المبجل _خالد زكريا
 
المشكلة فى اللى لسه جاى
خلاص الامتحان خلص والحول برده خلص والاجابات الله اعلم بيها 
وخلاص قاعدين مستنين الفرج اما باب المشرحة يتفتح ونخرج ونروح
تلاقى وانت خارج واحد زميلك  ف الدفعة عمال بيعيط قدام الدكتور ويتحايل عليه وهو رافض تماما انه يوافق على ايه معرفش
بس انا قدامى  حالة صوعبت عليا -كالعادة المهببة-بس انا مفيش فى ايديا حاجة اعملها ولا عارفة الموضوع ايه اصلا 
وخلاص هاطلع بقى وربنا يتولاه 
بس خلاص بالتفت وخارجة انا وصاحبتى لاقيت الدكتور بيسالنا واحنا ماشيين حد معاه موبايل ؟؟؟
صاحبتى بصيت لى وردت ع الدكتور وقالتله لاء
بس على مين يعنى ينفع اكدب
انا كنت باشوف الساعة وطلعت الموبايل ومعايا فى ايدى الموبايل
فبعقلى الامور اللى قولت عليه تصرفت وبكل تلقائية وقولت ايوة يادكتور انا معايا اتفضل وفعلا اتفضل واخده واخد اسمى ورقم جلوسى  وانا طبعا مارضيتش اديله العنوان لانى مرتبطة
طبعا انا راحة باديله الموبايل على اساس ان الواد اللى واقف ده حاصله له مشكلة والدكتور هيتصل بحد يحلها له او هيتصرف بشكل او باخر والموضوع يخلص
 وخلص بعد سويعات 
وهو واخده منى على اساس انى باغش منه 
وخد بالك  باغش من الموبايل وراحة اديهوله
المهم
بعد كلام طويل عريض من الدكتور اللى بيقنعنى انى غلط وانه لو عملى دلوقتى محضر غش واثبات حالة -كان ناقص يقولى فيش وتشبيه-هيبقى كده مش ظالمنى وان تصرفى غلط فى غلط ولولا ان انا زى بنته ماكانش زمانه سابنى
نهايته
نطلع من الكلام ده بايه-على راى خيخة - ان سياتك ماينفعش تساعد حد ولا تفكر اصلا انك تساعده وخلى ودنك من طين والتانية من طين برده واعمل نفسك ميت 
بدل مايبقى كله ضرب ضرب

معرفش انا باكتب ليه اصلا وانا بقالى مدة طووووويلة ماجيتش

بس اللى اعرفه انى كنت متوترة جدا وعايزة اطلع التوتر ده فى حاجة ملقتش غير احسن من تكتكة الكيبورد اللى ريحتنى

 
خايفة اقول محدش يعمل باللى فى الصورة ده
اتفهم غلط بس انا عن نفسى هابطل احشر نفسى واعمل فيها فاعلة خير 
وكل عام وانتم بخير